Azərbaycanın Xalq artisti, Milli Konservatoriyanın kafedra müdiri Arif Babayevin bildirdiyinə görə, son dövrlər belə təhlükələrlə üzləşən gənclərə tez-tez rast gəlir

Kişi müğənnilərdə ən təhlükəli dövr mutasiya illəri hesab olunur. Həmin dövrdə səs qorunmasa, bata bilər. Azərbaycanın Xalq artisti, Milli Konservatoriyanın kafedra müdiri Arif Babayevin bildirdiyinə görə, son dövrlər belə təhlükələrlə üzləşən gənclərə tez-tez rast gəlir:
“Bundan daha çox muğam ifaçıları əziyyət çəkirlər. Çünki səs dəyişən dövrdə hündürdən, zil notlarda oxumaq olmaz. Müəllim nəzarətində olan ifaçı bu dövrü təhlükəsiz keçirə bilir. Muğam ifaçıları üçün mutasiya dövrü “ölüm-qalım” deyimi qədər önəmli hesab olunur. Çünki muğamların hər birində yüsək notlar var və bu yerdə səs öz imkanlarını daha qabarıq göstərə bilir”. Arif müəllim Qarabağın işğalından əvvəl səsi batan xanəndələrə nadir hallarda rast gəldiyini deyir:
“Qarabağ torpağının yetişdirdiyi insanların əksəriyyəti gözəl səsə malik olur. Bakıya gəlib məktəb keçəndən sonra onlar bu istedadı peşəkar səviyyədə göstərə bilirlər. Bizim dövrdə səs batmaq problemi nadir hallarda özünü göstərirdi. İndi 2-3 uşaqdan birində səs dəyişir və təhlülkəli dövrü aşandan sonra bəziləri əvvəlki kimi oxuya bilmirlər. Biz əlimizdən gələn qədər onlara yol göstərməyə çalışırıq. Amma səs ilahi vergisi olduğundan onu kiməsə bəxş etmək və ya almaq insanın əlində deyil”.
Söhbəti zamanı xanəndə vurğuladı ki, son illər gənclər muğam sənətinə böyük maraq göstərirlər. Xalq artisti bunun sənətin inkişafı ilə yanaşı, dünya səhnəsində təbliğində də böyük rol oynayacağını bildirdi:
“Azərbaycanda muğam sənətini tədris edən məktəblərin sayı kifayət qədərdir. Gənclərin savadlanması üçün onlara lazımi imkanlar yaradılıb. Vacib olan budur ki, onlar düzgün istiqamətlənməyin yolunu tapsınlar və savadlı xanəndə kimi yetişsinlər”.


Xədicə, milli.az

+  -  Çap