Təqsirləndirilən banka məxsus vəsaiti mənimsəməkdə təqsirləndirilir

Martın 9-da Ağır Cinayətlərə Dair İşlər üzrə Məhkəmədə hakim Rasim Sadıxovun sədrliyi ilə "Kapital Bank" Açıq Səhmdar Cəmiyyətinin əməkdaşlarının cinayət işi üzrə məhkəmə prosesi keçirilib. Məhkəmə qarşısında bankın Şəmkir filialının baş mühasibi Şahin Əliyev, bank filialının əməkdaşları Rasim Nağıyev, Arif Hümbətov, Nisə Bayramova, Mənzər Paşayeva cavab verir. Təqsirləndirilən şəxslər Cinayət Məcəlləsinin 179.3.2-ci (mənimsəmə və ya israf etmə külli miqdarda törədildikdə), 313-cü (vəzifə saxtakarlığı) və 314-cü (səhlənkarlıq) maddələri ilə ittiham olunublar. İttihama görə, Ş.Əliyev "Kapital Bank" ASC-nin Şəmkir filialının baş mühasibi vəzifəsində çalışarkən adıçəkilən şəxslərlə əlbir olaraq 2007-ci il sentyabrından 2009-cu il aprelinədək olan müddət ərzində öz qulluq mövqeyindən istifadə edib. Belə ki, filialda fəaliyyətdə olan "Wester ", "Privatmoney", "Miqom", "Kontakt" və "Blizko" sürətli pul köçürmələri sistemləri adı ilə müxtəlif şəxslərin adlarına kassa məxaric orderləri yazıb imzalayaraq bankın xəzinəsindən banka məxsus 417 550 ABŞ dolları məbləğində vəsaiti mənimsəyiblər. Martın 9-da keçirilən prosesdə dövlət ittihamçısı təqsirləndirilən şəxslərə cəza istəyib. Prokuror Ş.Əliyevin 11, R.Nağıyevin 5, A.Hümbətov, N.Bayramova, M.Paşayevanın hər birinin 2 il müddətinə azadlıqdan məhrum edilməsini istəyib.

+  -  Çap