Holland çalışdırıcı oyunsonrası penaltilərin ləğv olunmasını istəyir

"Bavariya"nın holland çalışdırıcısı Lui van Qalın futbolda yenilik tərəfdarı olduğunu açıqlayıb. O, "Kikker" nəşrinə açıqlamasında futbol qaydalarında bir sıra köklü dəyişikliklər edilməsinin zəruriliyindən danışıb: "Məncə, bir sıra qaydalar dəyişməlidir. Məsələn, mən oyunsonrası penaltilər seriyasının yox, qladiatorların döyüşünün qatı tərəfdarıyam. Bu baxımdan öz variantımı da sizlərdən gizlətmirəm. Matçın əsas vaxtı heç-heçə başa çatarsa, əlavə vaxtda hər 5 dəqiqədən bir komandalardan bir oyunçunu mübarizədən kənarlaşdırmaq maraqlı olardı. Başqa sözlə, 96-cı dəqiqə başlayanda meydanda hər komandada 10 nəfər olmalı, 101-ci dəqiqədən sonra 9-un 9-a mübarizəsi başlamalıdır. Bu prinsiplə 116-cı dəqiqə başlayandan sonra hər komandanın heyətində 6 futbolçu qalacaq. Belə vəziyyətdə güclü komanda mütləq rəqib qapısına yol tapmaqla qələbəni təmin edə bilər. Daha oyunsonrası penaltilər seriyasına ehtiyac duyulmayacaq. Yox, 120 dəqiqəlik mübarizə nəticəsində də qalib müəyyənləşməsə, o zaman "qızıl qol" qaydası qüvvəyə minsə daha yaxşı olar. Digər yenilik isə mübahisəli vəziyyətlərdə insanın yox, texnikanın yekun qərar verməsinin zəruriliyi ilə bağlıdır. Bilirsiz, texnika insandan fərqli, müstəqil və obyektivdir. Hə, topun qapı xəttini keçib-keçməməsini müəyyən etmək üçün mikroçipdən istifadə etmək variantı pis olmazdı. FİFA-nın bu sistemə nəyə görə "yox" dediyini heç cür anlaya bilmirəm. Digər yenilklərə də əl atmaq olar. Məncə, futbolda topu autdan oyuna əllə yox, ayaqla daxil etmək daha doğrudur. O zaman müdafiə olunan komanda topu çətin ki, yenidən yan xətdən çıxarsın. Basketbolda və ya hokkeydə olduğu kimi, futbolda da iki hakimdən istifadə etmək zəruridir: onların hər biri meydanın rəqib komandalara aid olan hissəsində fəaliyyətdə olmalıdır. Belədə hakimlər topa daha yaxın olmaq şansına malik olar. Başqa sözlə, mübahisəli epizodlarda daha doğru qərar çıxarmaq ehtimalı artar. Videosistem qüvvəyə minəcəyi halda laysmanlara ümumiyyətlə ehtiyac qalmayacaq".

+  -  Çap