Yunanıstan ayağa qalxdı

Qlobal iqtisadi böhranın ən çox silkələdiyi ölkələrdən olan Yunanıstanın rəhbərliyi büdcə kəsirini qapatmaq üçün şok addımlara əl atıb. Nazirlər Kabineti büdcədən maliyyələşən müəssisələrdə maaşları azaltmağa qərar verib. Əlavə dəyər vergisinin 21 faizə çıxarılacağı, sosial ödənişlərin 12 faiz azaldılacağı, yanacağa 3-8 sent, spirtli içkilərə 20 faiz, siqaretə 65 faiz əlavə vergi alınacağı bildirilir. Avtomobil və yaxta almaq da daxil olmaqla 35 min avrodan çox alış-veriş edənlərə əlavə vergi tələbi qərarlaşdırılıb. Qış tətilində verilən 13-cü və yay tətilində verilən 14-cü maaşlar 30 faiz azaldılacaq, pensiyalar kəsiləcək. Bu addımlarla 4,8 milyard avroya qənaət etmək planlaşdırılır. Hökumət ölkənin büdcə kəsirinin daha 4,8 milyard avro azaldılmasına dair tədbirləri də bəyənib. “Blomberg” agentliyinin verdiyi xəbərə görə, hökumət ölkə büdcəsinin məxaric hissəsini 2,4 milyard avro azaltmaq və mədaxil hissəsini eyni məbləğdə artırmaq niyyətindədir. Büdcə gəlirlərinin bu il ikinci dəfə tütün məmulatı və alkoqollu içkilərin aksizlərinin, habelə satışdan əldə olunan gəlirlərin yüksəldilməsi hesabına artırılması nəzərdə tutulur. Son məlumatlara görə, Yunanıstanda 200-dən artıq şəxs Maliyyə Nazirliyinin binasına hücum edərək, onun bir hissəsini ələ keçirib. «İTAR-TASS» agentliyinin məlumatına görə, onlar ölkənin Kommunist Partiyasına yaxın sayılan həmkarlar ittifaqlarının üzvləridir. Onlar hökumətin büdcə kəsirinin aradan qaldırılması üçün sərt qənaətləri nəzərdə tutan proqramı qəbul etməsinə qarşı çıxır. Binanın girişini də tam nəzarətə götürmüş nümayişçilər qurumun işçilərini çölə çıxmağa qoymayıblar. Binanın üzərində asılmış plakatda isə yazılıb: «Hamı küçələrə çıxsın və antixalq tədbirlərinə etiraz etsin!»


Kamran

+  -  Çap