Sanksiyaların əhaliyə mənfi təsir göstərməyəcəyi bildirilir

ABŞ, Fransa və Böyük Britaniya İrana yeni sanksiyaların tətbiqini nəzərdə tutan qətnamə layihəsinin qaralama variantını Pekin və Moskvaya təqdim edib. MIGnews.com saytının yaydığı xəbərə görə, sənəddə Tehranın üzləşəcəyi konkret məhdudiyyətlər açıq şəkildə göstərilib. Təşəbbüskarlar hesab edir ki, yeni sanksiyalar İranın nüvə proqramının inkişafına ciddi təsir göstərməlidir. Onlar İslam respublikasının bank sisteminə, milli sığortaya və gəmi daşımalarına da ciddi zərbə vurmalıdır. Sanksiyaların İranın neft sənayesinə toxunmayacağı, adi əhaliyə mənfi təsir göstərməyəcəyi də bildirilir. Öz növbəsində İran prezidenti Mahmud Əhmədinejad İranın digər ölkələrdəki səfirləri ilə görüşündə bildirib ki, ABŞ rəsmiləri İran xalqına zülm etsələr də, heç kim İran hökumətinin ABŞ xalqına qarşı nifrət etdiyini düşünməməlidir. Əhmədinejad deyib ki, insanlar arasında bərabərlik İranın xarici siyasətinin əsasını təşkil edir. "Xarici siyasətdə sədaqət, ədalət və bütün insanlara hörmət kimi məsələlər diqqət mərkəzində olmalıdır" – deyə o vurğulayıb. Əhmədinejadın sözlərinə görə, İran öz düşmənlərinə qarşı ədalətdən kənar iş görməməlidir.

+  -  Çap