Valyutadəyişmə məntəqəsinə basqın edən şəxs haqqında məlumat verən şəxslərə mükafat təyin edilib

Sumqayıt şəhərində valyutadəyişmə məntəqəsinə basqın edən şəxs haqqında məlumat verən şəxslərə mükafat təyin edilib. Bu barədə Daxili İşlər Nazirliyi (DİN) və Respublika Baş Prokurorluğunun mətbuat xidmətləri birgə məlumat açıqlayıb. Məlumata görə, anonimlik tam təmin edilməklə düzgün xəbər verən şəxsə 10.000 manat pul mükafatı veriləcək. Qeyd edək ki, fevralın 20-də saat 07.30 radələrində Sumqayıt şəhərində valyutadəyişmə məntəqəsində işləyən Vüqar Balayev naməlum şəxs tərəfindən "Makarov" tipli tapança ilə qətlə yetirilib. Onun atası İsmayıl Balayevə isə bıçaqla xəsarət yetirilib. Faktla bağlı Cinayət Məcəlləsinin müvafiq maddələri ilə cinayət işi başlanaraq intensiv əməliyyat-axtarış tədbirləri və istintaq hərəkətləri davam etdirilir. Cinayətdə şübhəli bilinən təxminən 25-30 yaşlı, boyu 170-175 sm., atletik bədən quruluşlu, ağ bənizli, saçları qısa şabalıdı rəngli, gözləri qıyıq formalıdır. Azərbaycan dilində sərbəst danışır. Həmin şəxsin fotorobotu hazırlanaraq kütləvi informasiya vasitələri ilə yayımlanıb. DİN VƏ Baş Prokurorluq fotorobotu bir daha təqdim edərək onu tanıyanlardan və ya yerini bilənlərdən Baş Prokurorluğun 440-78-59, Daxili İşlər Nazirliyinin 590-93-31, 492-73-96, "102 Zəng Xidməti" və Sumqayıt şəhər Polis İdarəsinin 497-64-53 nömrəli telefonlarından birinə zəng vurmalarını xahiş edir.

+  -  Çap