Gəncədə gigiyenik tələblərə cavab verməyən, sanitar normalara uyğun olmayan dönər məhsullarının satışına nəzarət gücləndirilib. Bu məqsədlə dönər bişirilən obyektlərdə reydlərə başlanılıb

SİA-nın bölgə müxbiri xəbər verir ki, Şəhər Gigiyena və Epidemiologiya Mərkəzi tərəfindən təşkil olunan yoxlamalar zamanı qida məhsulunun keyfiyyəti hazırlanma qaydalarının norma və tələblərə cavab verib-verməməsi araşdırılıb. Xüsusəndə quş ətindən, daha doğrusu toyuqdan hazırlanan dönərlərin satılıb-satılmaması diqqətdə saxlanılıb. Yoxlamalar göstərib ki, ölkənin ikinci böyük şəhərində quş ətindən dönər məhsulları satılır, eyni zamanda bu obyektlərdə şərait ürək açan deyil. Ayrıca bəzi dönərxanalar Gigiyena və Epidemiologiya Mərkəzinin icazəsi olmadan fəaliyyət göstərir. Bu isə burada çalışan işçilərin sağlamlıqlarına, eyni zamanda hazırlanan məhsulların keyfiyyətinə nəzarətin olnmadığını təsdiq edən digər başlıca amildir.
Gigiyena və Epidemiologiya Mərkəzinin şöbə müdiri Kərim Abbasoğlunun SİA-nın bölgə müxbirinə verdiyi məlumata əsasən dönər satışı ilə məşğul olan şəxslərə əvvəlcədən xəbərdarlıq edilb. Məktub göndərilərək bu vətəndaşlara quş ətindən dönər satılmasına qadağa qoyulması bildirilib.
Ortaya çıxan mənzərə digər bir məsələnidə diqqət mərkəzinə gətirib. Hazırda Gəncə şəhərinin əksəriyyət dayanacaqları təyinatına uyğun fəaliyyət göstərmir. Başqa ifadə ilə desək dayanacaqlarda dönər satılır. Bu isə ümumiyyətlə qadağandır. Çünki bu dayanacaqlarda gigiyenik qida məhsullarının bişiriliməsi və satışı üçün heç bir şərait yoxdur.
Reydlər zamanı isə 10-dan artıq dönərxananın fəaliyyəti dayandırılıb. Ümumiyyətlə isə il ərzində fəaliyyətinə xitam verilən dönərxanaların sayı 20 dən artıqdır.

+  -  Çap