Bu öıkənin sabiq prezidenti Haşimi Rəfsəncaninin övladları haqqında cinayət işini başlanıb

İranda siyasi gərginlik səngimək bilmir. Müxalif siyasətçilərə qarşı təzyiqləri davam etdirən hökumət bu dəfə Məsləhət Şurasının sədri Haşimi Rəfsəncaninin övladları haqqında cinayət işini başladıb. “Farsnews”ın yaydığı məlumata görə, İranın ədliyyə naziri Mürtəza Bəxtiyari bildirib ki, Haşimi Rəfsəncaninin övladları Mehdi və Faizə Haşimi Rəfsəncanilər 2009-cu ilin iyun ayından etibarən ölkədə dəfələrlə qarışıqlıq salıb, qeyri-qanuni küçə yürüşlərində iştirak edərək insanları qarşıdurmaya səsləyiblər. Nazir hər iki şəxs haqqında indiyə qədər bəzi araşdırmalar aparıldığını bildirib. Hazırda onlar haqqında rəsmi olaraq cinayət işi başlanıb və sabiq prezidentin övladları törətdiyi əməllərə görə məhkəmə qarşısında cavab verməli olacaqlar. Yeri gəlmişkən, müxalifət lideri Mir Hüseyn Musəvinin ölkə boyu genişmiqyaslı etiraz aksiyalarına başlamaq çağırışı geniş rezonans doğurub. Parisdə sürgündə yaşayan İranın sabiq prezidenti Əbülhəsən Bəni Sədr müxalifət lideri Mir Hüseyn Musəvinin bəyanatının açıq şəkildə onun rejimdən ayrıldığını göstərdiyini deyib. Sədr Musəvinin bəyanatının və bir neçə gün bundan əvvəl Mehdi Kərrubinin referenduma çağırmasının birbaşa ali ruhani lider Əli Xameneyiyə meydan oxuma adlandırıb.
Qeyd edək ki, siyasi gərginliyin hökm sürdüyü İranda Musəvinin çağırışı dini ruhani lider ayətulla Əli Xameneyinin Musəvi və digər müxalifət liderlərinin rejimdən kənarlaşdırılmalı olduğunu deməsindən bir neçə gün sonraya təsadüf edir. Musəvinin ali ruhani lider ayətulla Xameneyiyə müxalifətin etiraz yürüşləri keçirməsinə icazə verməsi barədəki müraciəti onun açıq itaətsizliyini nümayiş etdirib. İranın ali ruhani lideri müxalifət liderlərinin rejimdən tam olaraq kənarlaşdırılmasına çağırıb ki, bu onların seçkilərdə iştirakının da qarşısını ala bilər. “Mən və digər müxalifət lideri Mehdi Kərrubi düşünürük ki, Yaşıl Hərəkata nümayişlər keçirməsinə imkan verilməli və bizim hərəkatımızın gücü barədə şaiələrə son qoyulmalıdır” - deyə Musəvi bildirib. Musəvi deyib ki, fevralın 11-də hökuməti dəstəkləmək məqsədi ilə keçirilən nümayiş təhlükəsizlik qüvvələrinin köməyi ilə təşkil edilib. Musəvi 1979-cu il inqilabının ildönümü münasibəti ilə hökumətin təşkil etdiyi yürüşləri hakimiyyətdəki son dövrlərində Rıza şah Məhəmməd Pəhləvinin başçılığı ilə keçirilən yürüşlərlə müqayisə edib. O deyib ki, belə yürüşlər şah dövründəki müstəbid metodları və məntiqi xatırladır, onlarla fəxr etməyə dəyməz. Musəvinin “Kəlameh” veb səhifəsinə müsahibəsi zamanı dediyi bu sözlər hökumətə qarşı güc nümayişidir.


Hazirladı: Kamran

+  -  Çap