Türkiyə ilə protokolların müzakirəsi cəmiyəti ikiyə bölüb

Ermənistan-Türkiyə münasibətlərinin normallaşdırılmasına dair protokollar fevral ayının 19-da ilkin müzakirələrin aparılması üçün Ermənistan parlamentinin xarici münasibətlər üzrə daimi komissiyasına təqdim olunacaq. Bu barədə Yerevanda keçirilən mətbuat konfransında Ermənistan parlamentinin xarici münasibətlər üzrə komissiyasının sədri Armen Rustamyan bildirib. “Biz protokolların ilkin müzakirəsi üçün xüsusi üsulun hazırlanmasını təklif etdik və komissiyanın yekun qərarından sonra protokolların parlamentdə dördgünlük müzakirəyə təqdim olunması üçün spikerə müraciət etdik” - deyə A. Rustamyan bildirib. O həmçinin əlavə edib ki, müzakirələr kifayət qədər açıq və şəffaf aparılacaq. Komissiya sədrinin sözlərinə görə, Ermənistan parlamentinin reqlamentinə əsasən beynəlxalq saziş qəti şəkildə gündəliyə daxil ediləcək, daha sonra isə dördgünlük müddətə müzakirələrə göndəriləcək. Ekspertlər qeyd edir ki, Türkiyə ilə münasibətlərin normallaşdırılmasını nəzərdə tutan protokolların Ermənistan parlamentində müzakirəyə hazırlanması ölkədə çaşqınlıq yaradıb. Hətta hakim Respublika Partiyasının daxilində də məsələylə bağlı yekdil fikir yoxdur. Partiyanın bəzi nümayəndələri parlamentin protokolları ratifikasiya etməsini lazım bilir. Digər qrup isə hesab edir ki, Yerevan Ankaradan əvvəl bu addımı atmamalıdır. Hakim partiyanın deputatı Karen Avaqyan partiya daxilindəki ziddiyyətləri gizlətməyə çalışıb. O, məsələ ilə bağlı keçirilən tədbirdə deyib: «Protokolların ratifikasiyası ilə bağlı mövqe prezident Serj Sarkisyan tərəfindən açıq şəkildə bəyan olunub. Respublika Partiyasında başqa fikir yoxdur». Hakim partiyada çoxluğun protokolların ratifikasiyasına tərəfdar olması haqda sualı cavablandıran deputat deyib: «Respublika Partiyasında çoxluq və ya azlıq anlayışı yoxdur. Bizi «İrs» partiyası ilə səhv salmayın. Ermənistan protokolları Türkiyədən əvvəl ratifikasiya etməyəcək». Tədbirdə «İrs» partiyasını təmsil edən Stepan Safaryan həmkarının bu fikrinə sərt reaksiya verib: «Bu bəyanat bir daha göstərir ki, Dağlıq Qarabağ münaqişəsinin həlli prosesinin hazırki mərhələsi Ermənistan prəhbərliyini bəzi addımlar atmağa məcbur edir. Onlar bu addımlarla mümkün sanksiyalardan qurtulmağa çalışır. Düşünürəm ki, baş verənlər Ermənistanın protokolları birinci ratifikasiya edəcəyini göstərir». Safaryan bildirib ki, Ermənistanın hazırki hakimiyyəti həmişə bir şey deyir, başqa şey edir: «Sarkisyan bir vaxtlar bəyan etmişdi ki, Türkiyə ilə sərhədlər açılmasa, iki ölkənin futbol komandaları arasında matçı izləmək üçün Bursaya getməyəcək. O, Bursaya tursit kimi səfər etməyəcəyini bildirirdi».


Azər NURİYEV

+  -  Çap