Müxalifət isə onun azad olunmasını tələb edir

Şri-Lankada prezident seçkilərindən iki həftədən çox vaxt keçməsinə baxmayaraq, gərginlik səngimək bilmir. Belə ki, seçkilərin qalibi olan hazırki prezident Mahinda Radyapaksenin keçmiş rəqibi, silahlı qüvvələrin keçmiş komandiri Sarat Fonsekanı dövləti xəyanət ittihamı ilə həbs etdirməsi etiraz aksiyalarına səbəb olub. Bu səbəbdən də müxalifət qüvvələri Kolombo küçələrinə minlərlə tərəfdarını çıxarıb və onlar Ali Məhkəmənin önünə doğru irəliləyiblər. Liderləri general Sarat Fonsekanın azadlığa buraxılmasını tələb edən müxalifətçilərin qarşısını hazırki prezidentin tərəfdarları kəsib. Onlar məhkəməyə gedən yolda Fonseka tərəfdarlarını daş yağışına tutublar. Qəzəblənmiş kütləni sakitləşdirmək üçün əraziyə polis və xüsusi təyinatlılar cəlb edilib və onlar da gözyaşardıcı qazlardan və suatanlardan istifadə edərək aksiyanı dağıdıblar. Ölkənin müxalifət partiyalarının yaydığı birgə məlumatda qeyd olunub ki, Fonsekanın həbsi onun fiziki cəhətdən aradan götürülməsinə yönəlib. Şri-Lanka Müdafiə Nazirliyinin yaydığı məlumatda göstərilib ki, 59 yaşlı istefada olan general tərəfdarları ilə birgə dövlət çevrilişi həyata keçirmək istəyib. Prezidentliyə keçmiş namizədin xanımı Anoma Fonseka bildirib ki, ərini çox kobud şəkildə həbs ediblər: "Onu evdən sanki heyvanı çıxarırmış kimi sürüyüb naməlum istiqamətə apardılar".
Yeri gəlmişkən, qeyd edək ki, prezident seçkilərinə kimi Fonseka Radyapaksenin ən yaxın tərəfdarı olub. Məhz onun komandanlığı ilə "Tamil pələngləri"nə qarşı hərbi əməliyyatlar başlamışdı. Ötən ilin yazında başlayan əməliyyat "pələng"lərin tamamilə məhv edilməsinə gətirib çıxarmışdı. Lakin bu qələbədən sonra prezidentlə müharibə qəhrəmanı" arasından sanki qara pişik keçdi. Əvvəlcə Fonseka ali baş komandan vəzifəsindən istefa verdi, sonra isə açıq şəkildə Fonsekaya qarşı mübarizəyə başladı. O, prezidentliyə namizəd kimi qeydiyyatdan keçdi. Özü də seçkilərdə müxalifət partiyaları - həm sollar, həm də sağlar onun tərəfinə keçdi. Müxalifət hesab edir ki, bu iş quramadır və ikinci müddətə seçilən prezident özünün nüfuzlu rəqibini neytrallaşdırmaq istəyir. Müşahidəçilərin qənaətincə isə Fonsekanın həbsi siyasi motivlər güdür. O, seçkilərdə əsas rəqibi olmuş bu şəxsi sadəcə neytrallaşdırmaq istəyir. Bununla yanaşı, Fonseka həbsinə qədər hərbi cinayətlərin araşdırılması ideyası ilə çıxış edib. Söhbət "Tamil pələng"lərinə qarşı həyata keçirilən əməliyyatlar zamanı törədilən qətliamlardan gedir. O, bəyan edib ki, qanun qarşısında hamı cavabdehlik daşıyır. Lakin Fonsekanın bu addımını dəstəkləməyənlər də tapıla bilər. Müşahidəçilərin qənaətincə, Fonseka bununla keçmiş silahdaşlarını da özünə qarşı çevirə bilər.


Azər NURİYEV

+  -  Çap