"Vaşinqton Dağlıq Qarabağ münaqişəsi və Rusiya-Gürcüstan münasibətlərində yaşanan gərginlik də daxil olmaqla, regional problemlərlə dərindən məşğul olur". Bunu APA-nın Vaşinqton müxbirinə açıqlamasında Nikson Mərkəzinin icraçı direktoru Pol Saunders deyib. O, ABŞ-ın Azərbaycana olan marağına diqqət çəkərək iki ölkə münasiblərindəki prioritetlərin dəyişilmədiyinə əminliyini vurğulayıb: "ABŞ Əfqanıstan və İraq kimi daha problemli məsələlərə daha çox diqqət yetirir. Bu isə elə təəssürat yaradır ki, Birləşmiş Ştatlar digər bölgələrə lazımi qayğı göstərmir. Qətiyyən belə deyil". P.Saunders xatırladıb ki, ABŞ-Azərbaycan münasibətlərində terrorçuluğa qarşı mübarizə, eneryi təhlükəsizliyi və digər sahələrdə əməkdaşlıq prioritet istiqamətlərdir. Ekspertin fikrincə, Vaşinqtonda zənn edirlər ki, Dağlıq Qarabağ problemini həll etmədən bölgədə uzunmüddətli planlar qurmaq mümkün deyil. Analitik qeyd edib ki, Dağlıq Qarabağ problemi həll olunmadıqca region ölkələri öz iqtisadi hədəflərində, irimiqyaslı layihələrdə, uzunmüddətli sabitlik və beynəlxalq təminat məsələlərində məhdudiyyətlərlə qarşılaşacaqlar: "Rusiya-Gürcüstan müharibəsi bunu açıq-aydın göstərdi. Mən Qafqazda mövcud olan problemlərin həll olunacağına əminəm. Təbii ki, əgər bütün tərəflər xoş məram nümayiş etdirsələr... Münaqişə tərəfləri kənardan heç bir təzyiq gözləmədən öz aralarındakı problemləri özləri həll etməlidir".

+  -  Çap