Vergilər Nazirliyi operativ nəzarət tədbirlərini davam etdirir. Nazirliyin ictimaiyyətlə əlaqələr şöbəsindən qəzetimizə bildirilib ki, yanvar ayı ərzində keçirilmiş tədbirlərdə 1496 vergi ödəyicisi tərəfindən qanunvericiliyin pozulması faktları aşkarlanıb və müvafiq tədbirlər görülüb. Ötən ay 987 vergi ödəyicisi əhali ilə nağd pul hesablaşmalarının aparılması qaydalarına riayət etməyib. Valyuta sərvətlərinin ödəniş vasitəsi kimi qəbul edilməsi, valyuta sərvətlərinin ticarət, iaşə və xidmət müəssisələrində istifadə qaydalarını pozan ödəyicilərin sayı isə 100 nəfər olub. Keçirilən tədbirlər zamanı vergi orqanlarında uçota durmadan fəaliyyət göstərən 82 vergi ödəyicisi də aşkar edilib. 221 vergi ödəyicisi isə xüsusi razılıq (lisenziya) tələb olunan fəaliyyət növləri ilə belə razılıq olmadan məşğul olub. Vergi orqanlarının həyata keçirdiyi operativ nəzarət tədbirləri zamanı 24 vergi ödəyicisində 24 nəfər fiziki şəxsin əmək müqaviləsi bağlamadan işə cəlb edilməsi də üzə çıxarılıb. 146 vergi ödəyicisi isə fərqlənmə nişanı olmadan avtomobil nəqliyyatı ilə sərnişin daşımağa cəhd edib.
Aksiz markalarının tətbiqi vəziyyəti də qənatbəxş olmayıb. Bu sahəyə nəzarət məqsədilə keçirilən tədbirlər zamanı 16 vergi ödəyicisində 9468,2 manat dəyərində 1406 ədəd aksiz markaları ilə müvafiq qaydada markalanmamış mallar aşkarlanıb.


HƏQİQƏT

+  -  Çap