Yaxın aylarda donorlarla danışıqlar aparılacaq

Tezliklə "Elektron ticarət"lə bağlı veb portal fəaliyyətə başlayacaq. İqtisadi İnkişaf Nazirliyi tərəfindən yaradılacaq portal Azərbaycanda "Elektron ticarət"in formalaşdırılması sahəsində işlərin intensivləşdirilməsinə yönəlib. Belə ki, "2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı"nın həyata keçirilməsi üzrə Tədbirlər Planında bununla bağlı nazirliyə tapşırıq verilib. Nazirliyin mətbuat xidmətindən qəzetimizə bildirilib ki, veb portal tapşırığın icrasını təmin etmək üçün sahibkarların, xüsusilə də kənd təsərrüfatı məhsulları istehsalçılarının sərbəst bazara çıxışının dəstəklənməsi məqsədilə Almaniyanın Texniki Əməkdaşlıq Cəmiyyətinin (GTZ) "Özəl sektora dəstək proqramı" çərçivəsində həyata keçirilir: "Artıq İqtisadi İnkişaf Nazirliyi və "GTZ" təşkilatı "elektron ticarət"lə bağlı veb portalın yaradılması istiqamətində işlərə başlayıb. Belə ki, yaxın aylar ərzində veb portalın idarə edilməsi, həmçinin saxlanması xərclərinin maliyyələşdirilməsi və s. sahələrdə donorlarla danışıqlar aparılacaq". Nazırlikdən vurgulanıb ki, "Elektron ticarət"lə bağlı veb portal istifadəyə verildikdən sonra bu sahədə ictimaiyyətin, o cümlədən, kənd təsərrüfatı məhsulları istehsalçılarının və sahibkarların məlumatlandırılması və təlimlərin keçirilməsi ilə bağlı tədbirlər görüləcək.


HƏQİQƏT

+  -  Çap