Hindistanın əczaçılıq şirkətlərini təmsil edən 25 nəfərdən ibarət nümayəndə heyəti Azərbaycanda səfərdədir. APA-nın məlumatına görə, fevralın 8-də Azərbaycan və Hindistan əczaçılıq şirkətlərinin və Səhiyyə Nazirliyi rəsmilərinin iştirakı ilə seminar və alıcı-satıcı görüşü keçirilib.
Hindistanın Azərbaycandakı səfiri Debnat Şou bildirib ki, ölkəsində istehsal olunan dərmanlar uzun illərdir Azərbaycanda satılır, onların həm qiyməti münasibdir, həm də etibarlıdır. O, əczaçılıq sənayesinin Azərbaycanın qeyri-neft sektorunda mühüm sahələrdən biri olduğunu deyib. Diplomat deyib ki, bu görüşü keçirməkdə məqsəd bu sahədə Hindistan-Azərbaycan əməkdaşlığını genişləndirməkdir. Səhiyyə Nazirliyinin xarici əlaqələr şöbəsinin rəhbəri Samir Abdullayev isə Azərbaycanda 35 Hindistan əczaçılıq şirkətinin və 325 adda dərmanın qeydiyyata alındığını açıqlayıb. Azərbaycanda özəl xəstəxanalar istisna olmaqla səhiyyə xidmətlərinin pulsuz olduğunu xatırladan S.Abdullayev bəyan edib ki, Azərbaycan yüksək keyfiyyətli, uyğun qiymətlərə dərman almaqda maraqlıdır. O, hindistanlı əczaçıların suallarını da cavablandırıb.

+  -  Çap