Şirkət hökumətin və ölkədə fəaliyyət göstərən neft-qaz şirkətlərinin hesabatlarına rəy verəcək

Dünən Dövlət Neft Fondunda (DNF) Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsü (MHŞT) üzrə Çoxtərəfli Qrupun (ÇQ) ilk iclası keçirilib. Bu barədə qəzetimizə Dövlət Neft Fondunun içtimaiyyətlə əlaqələr sektorundan məlumat verilib. Mənbədən qeyd edilib ki, Çoxtərəfli Qrupun sədri, DNF-nin icraçı direktoru Şahmar Mövsümov MHŞT-nin Azərbaycanda tətbiqinə dair bir sıra məsələlərdən söz açıb. İclasda Çoxtərəfli Qrupun üzvləri ÇQ-nin 2010-cu il üçün iş planını müzakirə edərək təsdiq ediblər. MHŞT-də hesabatlılıq prosesinin təkmilləşdirilməsinə dair bir sıra təklifləri də müzakirə edən qrup üzvləri müvafiq qərarlar qəbul ediblər. Eyni zamanda, Mədən Sənayesində Şəffaflığın Artırılması üzrə QHT Koalisiyası MHŞT üzrə 11-ci hesabat (2009-cu ilin ilk 6 ayı) - hökumətin hesabatı və Müstəqil Mühasiblərin Rəyi ilə bağlı öz rəyini açıqlayıb. Fonddan vurğulanıb ki, iclasda MHŞT üzrə 12-ci hesabat mərhələsinə də start verilib. Qrup üzvləri audit şirkətinin seçilməsi məqsədilə keçiriləcək müsabiqədə iştiraka dair Azərbaycanda fəaliyyət göstərən və dünyada tanınmış nüfuzlu beynəlxalq audit şirkətlərinə bildiriş göndərilməsini qərara alıblar. Belə ki, audit şirkəti 2009-cu ili əhatə edəcək hesabatları təhlil əsasında tutuşdurmalıdır: "Təşəbbüsün Azərbaycanda həyata keçirilməsinə dair mexanizmə uyğun olaraq seçiləcək bu şirkət hesabat dövrü üzrə Azərbaycan hökumətinin və ölkədə fəaliyyət göstərən neft və qaz şirkətlərinin hesabatlarını təhlil edərək onlara rəy verəcək".


HƏQİQƏT

+  -  Çap