Sahibkarlara bu malların satışdan çıxarılması barədə tələbnamələr verilib

Lənkəran, Masallı və Astarada uyğunluq sertifikatı olmayan, təhlükəli qaz sobalarının satıldığı aşkarlanıb. Aşkarlanan faktlar Standartlaşdırma, Metrologiya və Patent üzrə Dövlət Komitəsinin 5 saylı Ərazi Dövlət Nəzarəti İdarəsi tərəfindən üzə çıxarılıb. Bu barədə komitənin mətbuat xidmətindən məlumat verilib. Belə ki, monitorinq zamanı Lənkəran şəhərində fiziki şəxs Vüqar Məmmədova məxsus mağazada "Süsler", "Westburq", "Luxell", "Nord", fiziki şəxs Mehman Axundova məxsus mağazada "Termes", "Süsler", fiziki şəxs Habil Ağayevə məxsus mağazada "Süsler", fiziki şəxs Mirəziz Ağayevə məxsus mağazada "Simens", fiziki şəxs Səbuhi Cabbarova məxsus mağazada "Temirkel" nişanlı mənşəyi məlum olmayan qaz sobaları müəyyən edilib. Bundan başqa, Masallıda yerləşən "Leyla-X" kiçik müəssisəsində "Adrian", fiziki şəxs Elvin Baxışova məxsus mağazada "Donar" nişanlı sertifikatsız məişət avadanlıqları, Astara rayonunda fiziki şəxslər Asif Fətəliyev, Ağamoğlan Hüseynov və Çinar Cəfərova məxsus mağazalarda kustar üsulla hazırlanmış qaz sobaları aşkar olunub. Bütün hallarda sahibkarlara adıçəkilən malların satışdan çıxarılması barədə tələbnamələr verilib.


HƏQİQƏT

+  -  Çap