Proses mərhələli şəkildə həyata keçirilməlidir

Ali təhsil müəssisələrinin yataqxanalarında məskunlaşan məcburi köçkünlərin hamısını birdən köçürmək qeyri-mümkündür. Ona görə də bu proses mərhələli şəkildə həyata keçirilməlidir. Bu barədə dünən təhsil naziri Misir Mərdanov məlumat verib. Nazirin sözlərinə görə, məcburi köçkünlərin ali məktəblərin yataqxanalarından köçürülməsinə bu il başlanacaq: "Bu barədə Nazirlər Kabinetinin iclasında ölkə prezidenti tərəfindən müəyyən məlumat verilib. Əli Həsənov da həmin məlumata əsasən bu açıqlamanı verib. Ölkə prezidentinin bir tapşırığı var ki, ali məktəblərin, ümumiyyətlə, təhsil müəssisələrinin özündə və yataqxanalarında məskunlaşan məcburi köçkünlər üçün evlər tikilsin və onlar oraya köçürülsün. Bu il ali məktəblərin yəqin ki bir neçəsində bununla bağlı işlər görüləcək". M.Mərdanov qış semestri imtahanlarının keçirilməsindən də söz açıb. Ali məktəblərdə qış semestr imtahanlarının artıq yekunlaşdığını deyən nazirin fikrincə, əvvəlki qış imtahan sessiyasından fərqli olaraq bu il müsbət istiqamətdə dəyişikliklər var. Belə ki, qış semestri zamanı Təhsil Nazirliyinin "Qaynar xətt"inə çox az sayda məlumat daxil olub: "Həmin müraciətlərə dərhal reaksiya verib, yerində araşdırmışıq. Hər halda bu il ali məktəblərin işə müəyyən qədər məsuliyyətli yanaşmasının nəticəsində narazılıqların sayı azalıb. Demək olmaz ki, hər şey biz istədiyimiz səviyyədədir. Amma hər halda addım-addım müəyyən irəliləyişlər əldə etmək olar". Ali məktəblərdə semestr və buraxılış imtahanlarının TQDK ilə birgə keçirilməsi məsələsinə də münasibət bildirən nazir bu istiqamətdə ciddi işlərin aparıldığını deyib.


HƏQİQƏT

+  -  Çap