Məhkəmə prosesi fevralın 10-da davam etdiriləcək

Bakı Apelyasiya Məhkəməsində valyutadəyişmə məntəqələrinə və digər obyektlərə basqınlar edərək cinayətlər törətməkdə ittiham olunan, dəstə üzvlərinin apellyasiya şikayəti üzrə məhkəmənın hazırlıq iclası keçirilib. Məhkəmə qarşısında 1998-2008-ci illər ərzində Bakı şəhərində 30-dan çox valyutadəyişmə məntəqələrinə və digər obyektlərə silahlı basqınlarda ittiham olunan sabiq polis əməkdaşları Mehdi Əmirəliyev, İrac Nəsrullayev və Ceyhun Qarayev, Rauf Rzayev, Seyran Bağırov və İsmayıl Feyziyev cavab verir. Dəstə Bakının müxtəlif rayonlarında 20-dən artıq belə cinayət törədib. Ağır Cinayətlərə Dair İşlər üzrə Məhkəmənin hökmü ilə Mehdi Əmirəliyev və İrac Nəsrullayevin hər birinə 15 il, İsmayıl Feyziyevlə Ceyhun Qarayevin hərəsinə 12, Rauf Rzayevə 4 və Seyran Bağırova 10 il müddətinə azadlıqdan məhrumetmə cəzası verilib. Prosesdə zərərçəkmiş Anar Hacıyevin nümayənədəsi Aydın Hacıyev vəsatətlə çıxış edib. O, bildirib ki, təqsirləndirilən şəxslərin cəzasının ağırlaşdırılması barədə Ağır Cinayətlərə Dair İşlər üzrə Məhkəmənin hökmündən apelyasiya şikayəti verib. Nümayəndə iddia edib ki, onun həmin şikayəti məhkəmə tərəfindən gizlədilib. A.Hacıyev onların da apelyasiya şikayəti vermələrinin nəzərə alınmasını xahiş etdi və məhkəmənin hazırkı mərhələdə təxirə salınmasını istədi. Hakimlər zərərçəkənin nümayəndəsinin vəsatətini təmin etdilər. Məhkəmə iclası fevralın 10-a kimi təxirə salındı.

+  -  Çap