"Mançester Siti" ortabablarla kifayətlənməli oldu

Hələ dekabrda "Mançester Siti"nin qış "transfer pəncərəsi" dövründə heyətini bir sıra məşhur futbolçularla gücləndirəcəyi haqda şayiələr səngimirdi. Amma İngiltərə klubu yalnız bir neçə, belə desək, ortabab futbolçularla kifayətlənməli oldu. "Şəhərlilər" yanvarın 31-də Adam Consonu sıralarına qatıb. İngiltərə gənclər yığmasının şərəfini qoruyan bu futbolçu əvvəlki klubu "Midlsbro"nu 7 milyon funt-sterlinq irəli salıb. A.Conson yeni klubuyla 2014-cü ilin iyununa qədər müddəti nəzərdə tutan anlaşma imzalayıb. Maraq üçün qeyd edək ki, Consonun transferi yanvarda Premyer Liqa klublarının imza atdığı ən bahalı keçiddir. "M.S."-nin çalışdırıcısı Roberto Mançini ötən ay Fernando Qaqonu da sərəncamında görmək istəyirdi. İngilislər bu məqsədlə "Real"a rəsmi müraciət etmişdi. İlkin təklif geri çevrildiyindən britaniyalılar növbəti dəfə madridlilərə üz tutmalı olub. Sonuncular isə 23 yaşlı argentinalını 16 milyon avro əvəzində İngiltərəyə buraxmağa razılıq verib. İspaniya klubunda müntəzəm yaşıl meydana çıxa bilməməsindən gileylənən Qaqo mundial ərəfəsində lazımi oyun praktikası qazanmaq niyyətində idi. "M.S." demək olar ki, onun keçidini həll etsə də, "transfer pəncərəsi"nin bağlanmasına qədər müvafiq sənədləri İngiltərə Futbol Assosiasiyasına çatdıra bilməyib. Bununla da gənc futbolçunun "Real"da qalacağı məlum olub.

+  -  Çap