"Gənclər: imkanlar, nailiyyətlər və perspektivlər" mövzusunda konfrans keçirilib

31 noyabr 1995-ci ildə Heydər Əliyev tərəfindən imzalanan fərman əsasında 2 Fevral Azərbaycan Gənclər Günü kimi qeyd olunur. Dünən bu münasibətlə "Gənclər: imkanlar, nailiyyətlər və perspektivlər" mövzusunda konfrans təşkil olunub. Tədbirə Azərbaycan Gənclər Təşkilatı Milli Şurasının (AGTMŞ) sədri, millət vəkili Fuad Muradov, Milli Məclisin vitse-spikeri Bahar Muradova, gənclər və idman nazirinin müavini İntiqam Babayev və bir çox təşkilatın nümayəndələri qatılıb.
Öncə AGTMŞ-nin sədri Fuad Muradov bütün Azərbaycan gənclərini bu bayram münasibətilə təbrik edib. O, Azərbaycan gənclərinin dünya ölkələri arasında və beynəlxalq layihələrdə çox yüksək səviyyədə çıxışının mərhum prezidentimiz Heydər Əliyevin və indi isə onun layiqli davamçısı olan İlham Əliyev cənablarının gənclərə göstərdiyi yüksək dəstəyindən irəli gəldiyini söyləyib. Azərbaycanın gənc bir ölkə olduğunu, buna baxmayaraq, dünya ölkələri arasında layiqli bir yer tutduğunu bildirən F.Muradov bu uğurlarda gənclərimizin rolunun böyük olduğunu vurğulayıb. Daha sonra çıxış edən Milli Məclisin vitse-spikeri Bahar Muradova bildirib ki, Azərbaycanda perspektivli və bacarıqlı gənclər çoxdur: "Biz daima onların arxasındayıq". O, gənclərin dövlətimizi dünya miqyasında yüksək səviyyədə təmsil etməsi üçün hər bir yardımın göstərildiyini vurğulayıb.
Gənclər və idman nazirinin müavini İntiqam Babayev isə geriyə baxdığımız zaman gördüyümüz işlərə qiymət verə bildiyimizi deyib. Son 3 ildə Azərbaycan gəncləri Avropada öz liderliyini qoruyub saxlayır: "Cəmiyyətimizin formalaşmasında gənclərimizin rolu böyükdür. Onlar Azərbaycan həqiqətlərini dünya ölkələrinə çatdırmaq üçün çalışırlar. Azərbaycan gənclərinin Avropa ölkələrinə nümunə kimi göstərilməsi bizim üçün sevindirici bir haldır".
Tədbir Azərbaycan gəncləri haqqında videofilmlərin nümayişi ilə başa çatıb.

İlkin MURADOV

+  -  Çap