Milli Məclisin dünənki iclasında "Tarix və mədəniyyət abidələrinin qorunması haqqında" qanuna əlavə və dəyişikliklər layihəsi müzakirəyə çıxarılıb. APA-nın xəbərinə görə, sənəd haqqında Milli Məclisin Mədəniyyət Komitəsinin sədri Nizami Cəfərov məlumat verib. Komitə sədri deyib ki, qanuna təklif olunan əlavə və dəyişikliklərdə mədəniyyət abidələrinin özəlləşdirlib-özlləşdirilə bilməməsinə aydıblıq gətirlir: "Elə abidələr var ki, onlar yerli əhəmiyyətli olsa da, özəlləşdirilməsinə və səmərəli istifadə olunmasına icazə verilmirdi. Qanuna təklif edilən əlavə və dəyişiklik bu problemi aradan qaldırır".
Müzakirələrdən sonra sənəd səsə qoyularaq qəbul olunub. Millət vəkilləri, həmçinin "Polis haqqında" qanuna, "Ölkədən getmək, ölkəyə gəlmək və pasportlar haqqında" qanuna və 2005-ci il 24 iyun tarixli 945-IIQ nömrəli qanunla təsdiqlənən "Vəzifəli şəxslər tərəfindən maliyyə xarakterli məlumatların təqdim edilməsi qaydaları"na əlavə və dəyişikliklər layihələrini də qəbul ediblər.
Bundan başqa, iclasda Xaçmaz rayonunun inzibati ərazi bölgüsündə qismən dəyişiklik edilməsi haqqında qanun layihəsinə də münasibət bildirilib.

+  -  Çap