"İran Azərbaycan ərazi bütövlüyü və suverenliyinə hörmət edir". APA-nın məlumatına görə, bu fikirləri Bakıda səfərdə olan İran xarici işlər nazirinin müavini Həsən Qaşqavi söyləyib. Dağlıq Qarabağ münaqişəsinin həlli ilə bağlı yurnalistlərin suallarını cavablandıran nazir müavini bildirib ki, bölgədə olan problemlər ancaq regional güclər tərəfindən həll oluna bilər: "Kənar güclər bu məsələdə yalnız öz maraqlarını güdürlər".
Qeyd edək ki, H.Qaşqavi dünən Bakıda İranın Azərbaycandakı səfirliyinin yeni binasının açılışında iştirak edib. Bu binada səfirliyin konsulluq, mədəniyyət və mətbuat şöbələri yerləşəcək. Nazir müavini bildirib ki, Azərbaycana səfərində məqsəd səfirliyin binasının açılış mərasimində iştirak etmək, Ayətullah Xomeyninin 31 il əvvəl Fransadan İrana qayıdışının ildönümü ilə bağlı tədbirə qatılmaqdır. İrana səfər edəcək Azərbaycan vətəndaşları üçün viza reyiminin ləğvi ilə bağlı qərarın fevralın 1-dən qüvvəyə mindiyini deyən XİN rəsmisi Bakıda Azərbaycan rəsmiləri ilə görüşlər keçirəcəyini də bildirib. Nazir müavininin sözlərinə görə, viza reyiminin ləğvi barədə qərar İrana səfər edəcək Azərbaycan yurnalistlərinə şamil edilməyəcək: "Yurnalistlər üçün viza ləğv olunmur, onlar İrana getmək üçün viza almalıdır".
H.Qaşqavi İranın səhiyyə naziri xanım Dəscidinin gələn həftə Bakıya gələcəyini deyib.
O, həmçinin qeyd edib ki, gələn ay Azərbaycan və İran parlament rəhbərlərinin görüşü olacaq.

+  -  Çap