5 nəfər dünyasını dəyişib

Dünən paytaxtda ağır yol-nəqliyyat hadisəsi baş verib. Hadisə səhər saatlarında Binəqədi rayonu ərazisində baş verib. Rayonun Binəqədi yolu, Poladəritmə zavodunun yaxınlığında 165 saylı iritutumlu avtobus 106 saylı avtobusla toqquşub. Binəqədi rayon Polis İdarəsindən verilən məlumata görə, qəzada 5 nəfər dünyasını dəyişib. Ölənlər "Daewoo" markalı 106 nömrəli marşrutun sürücüsü, 1954-cü il təvəllüdlü Ramiz Seyfullayev, 165 nömrəli, "İveco" markalı marşrutun sürücüsü, 1967-ci il təvəllüdlü Ağababa Əhmədov, sərnişinlər - 1950-ci il təvəllüdlü Minəxanım Quliyeva, 1983-cü il təvəllüdlü Murad Məlikov və 1960-cı il təvəllüdlü Sabir Zəkəriyyəyevdir. Qəza zamanı xəsarət alan üç nəfər - 33 yaşlı Namiq Şirinov, 35 yaşlı Tərzan və 37 yaşlı Tərlan Aydınov Klinik Tibbi Mərkəzə yerləşdiriliblər. Tərzan və Tərlan Aydınov qardaşlarına ilkin yardım göstərildikdən sonra evə buraxılıblar. Fövqəladə Hallar Nazirliyindən (FHN) verilən məlumata görə, xilasedicilər yol-nəqliyyat hadisəsində dünyasını dəyişən şəxslərin cəsədlərini avtomobillərdən çıxararaq aidiyyəti üzrə təhvil veriblər. Həmçinin, yanacaq-sürtgü materiallarının ətrafa dağılması nəticəsində baş verə biləcək təhlükənin qarşısını almaq məqsədilə hadisə yerində müvafiq təhlükəsizlik tədbirləri həyata keçirilib.
İlkin araşdırmalara görə, hadisənin baş verməsinə yüksək sürət səbəb olub və faktla bağlı Cinayət Məcəlləsinin 263.3-cü (yol hərəkəti və nəqliyyat vasitələrinin istismar qaydalarını pozma - ehtiyatsızlıqdan iki və daha artıq şəxsin ölümünə səbəb olma) maddəsi ilə cinayət işi başlanılıb və araşdırma aparılır.

+  -  Çap