Hadisə nəticəsində ölən və yaralananlar var

Azərbaycandan İraqın Kərbəla şəhərinə ziyarətə gedən zəvvarların avtobusu bu ölkənin Samirə şəhərində atəşə tutulub. Bakının Maştağa qəsəbəsinin sakini Hacı Zakir Quliyev APA-ya bildirib ki, yanvarın 28-də zəvvarları aparan avtobusun qarşısını kəsən naməlum şəxslər odlu silahdan atəş açıblar. Nəticədə Maştağa qəsəbəsinin sakini, 15 yaşlı Fatimə Əhmədova hadisə yerində ölüb, kənd məscidinin axundu Hacı Seyidağa və bir qadın yaralanıb. F.Əhmədovanın valideynləri də zəvvarlar arasında olublar. Hacı Zakir onu da əlavə edib ki, bu gün F.Əhmədova İraqda dəfn olunacaq, azərbaycanlı zəvvarların bir qrupu isə artıq İran İslam Respublikasına göndərilib.
Ziyarəti həyata keçirən şirkətlərdən biri olan "Kərbəla yolları" turizm firmasının İraqdakı nümayəndəsinin APA-ya verdiyi məlumata görə, hadisə 3 gün əvvəl baş verib: "Terror aktı baş verən vaxt azərbaycanlı zəvvarlar iranlı zəvvarlarla birlikdə olublar. Hadisə nəticəsində iranlı zəvvarlarla yanaşı, azərbaycanlılar da xəsarət alıb. Azərbaycandan olan bir qız - F.Əhmədova başından yaralanıb, bir gün sonra isə dünyasını dəyişib. İki nəfər yaralı vəziyyətdə xəstəxanaya yerləşdiriliblər. Hazırda yaralıların vəziyyəti stabildir və onlar yaxın günlərdə İraq hökumətinin dəstəyi ilə təyyarə ilə Azərbaycana yola salınacaqlar".
Azərbaycanın İordaniya və İraqdakı səfiri Elman Araslı APA-ya açıqlamasında olayı araşdıracağını deyib. O, hal-hazırda hadisə haqqında hər hansı informasiyaya malik olmadığını söyləyib: "Biz bu məsələni aydınlaşdırmağa çalışacağıq. Mən İraqın İordaniyadakı səfiri ilə də əlaqə saxlayıb ondan lazımi məlumatları bizə çatdırmasını xahiş edəcəyəm".

+  -  Çap