Həbsxananı tələsik bağlamaq müşkül işdir

"ABŞ 3 il ərzində Quantanamo həbsxanasını bağlayacaq". Bu barədə Amerika administrasiyasının Brüsseldəki nümayəndəsi məlumat verib. "Biz müəyyən edilmiş müddətdə həbsxananın bağlanmasına nail ola bilməsək də, irəliləyişə nail olduq" - deyə ABŞ Dövlət Departamentinin Quantanamonun bağlanması məsələlərilə məşğul olan nümayəndəsi Deniel Frid bəyan edib. Bu barədə cümə axşamı "Evroobserver" İnternet nəşri məlumat verib.
Nəşr xatırladıb ki, ABŞ prezidenti Barak Obama prezident vəzifəsinə başlamasından bir il sonra "Taliban" və "Əl-Qaidə" terrorçu qruplaşmaları ilə əlaqədə şübhəli bilinən şəxslərin saxlandığı həbsxananın bağlanacağını vəd etmişdi. Yeni müddətdən danışarkən amerikalı diplomat bu məqsədə "Obamanın ilk prezidentlik müddətində" nail olunacağına ümidini ifadə edib. B.Obamanın mandatı 2013-cü ilin yanvarında başa çatır. D.Frid Quantanamo məhbuslarının bir hissəsini öz ərazilərində saxlamağa razılıq verən Avropa ölkələrinə minnətdarlığını bildirib. Fransa, Böyük Britaniya, Belçika, İrlandiya, Portuqaliya, Macarıstan və Slovakiya hər 3 məhbusdan birini öz həbsxanalarında yerləşdirməyə razılıq veriblər. Onlardan birini artıq İsveçrə qəbul edib. İndi İspaniya həmin məhbusların böyük hissəsinin qəbul edilməsi şərtləri barədə danışıqlar aparır.
O, ABŞ-ın özünün bu dustaqları qəbul etməyə hazırlaşmadığı barədə şaiyələri rədd edib. "Biz daha təhlükəli olan, 2001-ci il 11 sentyabr terror aktı ilə əlaqəsi olan terrorçuları götürəcəyik. Onlar Nyu-York Federal Məhkəməsi qarşısında duracaqlar" - deyə D.Fred məlumat verib.


Azər NURİYEV

+  -  Çap