Azərbaycanın gömrük orqanlarının əməkdaşları atanın öz azyaşlı qızlarından narkodaşıyıcı kimi istifadə etməsi faktını aşkarlayıb. Bu barədə APA-ya Dövlət Gömrük Komitəsindən (DGK) məlumat verilib. Astara Gömrük İdarəsinin sərnişin şöbəsində İrandan Azərbaycana ailə üzvləri ilə birlikdə gələn İran vətəndaşı Nahani Eskandar Bahram və azyaşlı qızları Habibeh Nahari Eskandar, Mobina Narani Eskandar, Sevda Nahani Eskandar gömrük nəzarətindən keçirilərkən H.Eskandar və M.Eskandarın əyninə geyindiyi qara rəngli paltarın altından hər birindən 2 bağlamada olmaqla ümumi xalis çəkisi 2 015 q olan heroin, S.Eskandarın isə əyinə geyindiyi qırımızı paltarın altından 4 ədəd bağlamada olmaqla ümumi xalis çəkisi 1 010 q olan həşiş qətranı aşkar edilərək götürülüb. Fakt üzrə Dövlət Gömrük Komitəsinin İstintaq İdarəsində Cinayət Məcəlləsinin 206.3.2, 234.4.1 və 234.4.3-cü maddələri ilə cinayət işi başlanaraq istintaq aparılıb.
İstintaq zamanı müəyyən edilib ki, Nahari Eskandar Bayrami İranın Astara şəhərində olarkən şəxsiyyətləri istintaqla müəyyən edilməsi mümkün olmayan "Behnam Ətai"", "Farabi" və "Karman" adlı şəxslər və qeyriləriylə qabaqcadan əlbir olub qaçaqmalçılıq yolu ilə Azərbaycana gizli keçirib satmaq üçün qanunsuz olaraq külli miqdarda narkotik vasitələrin əldə edilməsi, daşınması və saxlanılması barədə sövdələşərək cinayət əlaqəsinə girib. O, "Behman Ətai" və "Farabi" adlı şəxslərdən Azərbaycanın Astara rayonunda "Kamran" adlı şəxsə çatdırmaq məqsədilə 2 015 q heroini və 1010 q həşiş qətranını satış üçün əldə edib. Ailə üzvləri ilə birlikdə Azərbaycana gələrkən həmin narkotik vasitələri azyaşlı uşaqların üzərlərində gizlədib. Bu hərəkətləri ilə Nahari Eskandar Bahrami Azərbaycan CM-nin müvafiq maddələri ilə cinayət əməli törədib, Yasamal rayon Məhkəməsi tərəfindən onun barəsində həbs-qətimkan tədbiri seçilib.
Astara Gömrük İdarəsinin Sərnişin-nəqliyyat şöbəsində, həmçinin İrandan gələn Hacı Hosseinlou Mohsen Safaralinin və Armand Davood Hosseinin idarə etdikləri "Scania" markalı THR-88825 nömrə nişanlı sərnişin avtobusuna gömrük baxışı keçirilərkən yük yerində İmam Əlinin təsviri əks olunmuş xalçanın taxta çərçivəsində 5 bağlamada 500,256 q heroin və 17 bağlamada 1 635 q həşiş qətranı aşkar edilib. Əməliyyat tədbirləri həyata keçirməklə Bəhruz Kərimov adlı şəxs həmin xalçanı Xətai rayonunda yerləşən "Təbriz qarayı"nda anbardar Eldar Zahirovdan götürüb uzaqlaşarkən DGK-nın Gömrük Sahəsində Hüquqpozmalara qarşı Mübarizə Baş İdarəsinin əməkdaşları tərəfindən saxlanıb. Fakt üzrə Cinayət Məcəlləsinin 206.3.2, 234.4.1 və 234.4.3-cü maddələri ilə cinayət işi başlanıb.

+  -  Çap