Qəhrəmanlar Budapeştdən "köçdülər"

Futzal üzrə Azərbaycan milli komandası Macarıstanda keçirilən Avropa çempionatının yarımfinalına vəsiqə qazanıb. Komandamız 1/4 final mərhələsi çərçivəsində Ukrayna ilə qarşılaşıb. Qitə çempionatına ilk dəfə qatılmış futzalçılarımız 3:3 hesabı ilə bitən qarşılaşmanın penaltilər seriyasında rəqibi məğlub edib - 4:2.
"Bizim oyunçuların çoxu paltardəyişmə otağında uşaq kimi ağlayırlar. Mən onları başa düşürəm. Bu, idmançı həyatıdır, kimsə uduzmalı idi. Həyat davam edir, dünya çempionatına hazırlaşırıq". Bu sözləri Ukrayna futzal yığmasının baş məşqçisi Qennadi Lisençuk deyib. O, oyundan sonra keçirilən mətbuat konfransında yetirmələrinin qol epizodundan yararlana bilməməsindən narazılıq edib: "Bu gün biz uduzmamalı idik. Elə epizodlar olurdu ki, top qapıya düşməli idi, ancaq dirəyin yanından keçirdi. Mənə xüsusilə qapımıza vurulan üçüncü qol ağır gəlir. Çünki həmin epizodda rəqib futzalçı qapıçımızın üz nahiyəsinə zərbə endirmişdi. Məhz qapıçımızın zədələnməsindən dərhal sonra yerinə yetirilən cərimə zərbəsi qol oldu. Buna baxmayaraq, Azərbaycanı ilk dəfə Avropa çempionatının yarımfinalına yüksəlməsi münasibətilə təbrik edirəm". Q.Lisençuk penaltiləri vura bilmədiklərinə görə də təəssüfünü gizlətməyib: "Bu gün 1 saatlıq məşqin yarım saatını penaltilərə həsr etmişdik. Hər kəs 10 zərbədən 10-nu da vururdu. Lakin matçdan sonra yetirmələrim oyundakı qol epizodlarını vura bilmədiklərinə, yorğunluğa və rəqib qapıçının yaxşı oyununa görə, şansdan istifadə edə bilmədilər".
Azərbaycan milli komandasının oyunçusu Rizvan Fərzəliyev də Ukrayna ilə oyun haqda fikirlərini açıqlayıb. UEFA-nın rəsmi saytına açıqlamasında 1/4 final mərhələsinin çətinliklə keçildiyini bildirən R.Fərzəliyev komandamızın ən yaxşısının kimliyinə aydınlıq gətirib: "Ukraynalılar son saniyələrdə qazandıqları 10 metrlik cərimə zərbəsindən qol vursaydılar, biz evə qayıdırdıq. Yaxşı ki ukraynalılar bu şansdan yararlana bilmədi. Penaltilər seriyasında isə bəxt və Tveryankin bizim tərəfimizdə idi. Düşünürəm ki, o, ən yaxşı qapıçıdır. Ümumiyyətlə, Ukrayna ilə qarşılaşmada bizim bütün oyunçular ən yaxşı idi".
Azərbaycan futzal yığmasının qapıçısı Andrey Tveryankin isə qələbəyə görə çox sevindiyini bildirib: "Biz Azərbaycan, o cümlədən özümüz üçün oynadıq. Əsas odur ki, hər şeyi ürəkdən edirdik".
Qeyd edək ki, milli komandamızın Ukrayna üzərində qazandığı qələbədə Tveryankinin də böyük rolu olub. 43 yaşlı rusiyalı qapıçı oyunsonrası penaltilər seriyasında rəqibin iki zərbəsini qaytarıb. O, yanvarın 28-də keçiriləcək yarımfinalda daha yaxşı çıxış edəcəyimizi düşünür: "Fikrimcə, yarımfinal matçı daha asan keçəcək. Çünki 1/4 finalda uduzan komanda turnirlə vidalaşırdı. Bu amil istər-istəməz psixoloyi gərginlik yaradırdı. Bundan sonra isə istənilən halda, iki matç keçirməliyik. Yəni, qarşıdakı görüşə rahat çıxacağıq. Hələ Macarıstana gələndə demişdim ki, geriyə medalla qayıda bilərik. İndi bu arzumuzun reallaşmasına 1 oyun qalıb".
Bu arada yarımfinala vəsiqə qazanmış futzal yığmamız dünən dünən Macarıstanın paytaxtı Budapeştdən Debretsenə köçüb. Futzalçılarımız çempionatda qalan hər iki matça məhz Debretsendə çıxacaq.
Yığmamız yanvarın 28-də "Foniks" İdman Sarayında yarımfinal oyununa çıxacaq. Bu qarşılaşmanın nəticəsindən asılı olmayaraq, təmsilçilərimiz yanvarın 30-da yenə bacarıqlarını nümayiş etdirəcəklər. Həmin gün komandamız finalda, yaxud 3-cü yer uğrunda görüşdə çıxış edəcək. Sayca 7-ci Avropa çempionatı yanvarın 30-da yekunlaşacaq. Futzalçılarımız, AFFA və Futzal Federasiyasının rəsmiləri, yurnalistlər və azarkeşlər yanvarın 31-də gecə saatlarında vətənə dönəcəklər.
1/4 final Azərbaycan - Ukrayna - 3:3 (penaltilər seriyası- 4:2)

+  -  Çap