Ötən həftə Akademik Opera və Balet Teatrında P.Çaykovskinin "Qu gölü" baletinin tamaşası keçirilib. Bir çox xarici şirkətlərin, səfirlik və diplomatik nümayəndəliklərin əməkdaşlarınını iştirak etdiyi tamaşada baş rolları Marinski adına Dövlət Akademik Opera və Balet Teatrının solistləri, Rusiyanın Əməkdar artistləri, balet artistlərinin çoxsaylı beynəlxalq müsabiqələrinin laureatları Anastasiya Koleqova və Danil Korfuntsev ifa ediblər. Teatrın balet truppasının artistləri və Xalq artisti, professor Cavanşir Cəfərovun rəhbərliyi altında simfonik orkestr də tamaşada yüksək səviyyədə çıxış ediblər. Tamaşadan sonra Anastasiya Koleqova deyib: "Bu mənim Azərbaycan Dövlət Akademik Opera və Balet Teatrında ikinci çıxışımdır. Hər dəfə Bakıya böyük məmnuniyyətlə gəlirəm. Bütün tamaşa boyu öz alqışları, "bravo" sədaları ilə məni ruhlandıran bakılı tamaşaçıları çox bəyənirəm. Teatrın balet truppası və orkestrlə birlikdə çıxış etmək mənə yüksək zövq verir. Bu şəhərə yenidən qayıtmaq və sizin teatrın səhnəsində bir daha çıxış etmək arzusu ilə Bakını tərk edirəm".


Təranə

+  -  Çap