Milli Məclisin ABŞ-da səfərdə olan üzvləri Kolorado ştatında görüşlər keçiriblər. Görüşlərdə iştirak edən millət vəkili Zahid Oruc APA-ya açıqlamasında bildirib ki, ABŞ səfərləri çərçivəsində Koloradoda yerli Konqresin rəhbəri və senatorlarla görüş keçiriblər. Görüşlərdə amerikalılara Dağlıq Qarabağ münaqişəsi ilə bağlı həqiqətlər çatdırılıb: "Biz Azərbaycan həqiqətlərini çatdıranda qarşı tərəfin bunu çox yüksək səviyyədə qəbul etdiyini gördük". Z.Oruc Koloradoda uydurma "erməni soyqırımı"nın simvolu olan abidə qoyulduğunu deyib. O, Qənirə Paşayeva ilə birlikdə Koloradoda azərbaycanlıların məruz qaldığı Xocalı soyqırımına həsr olunmuş abidənin qoyulmasını da təklif etdiklərini söyləyib: "Onlar bunu çox müsbət qəbul etdilər və müraciət olunarsa, münasib hüquqi addımlar atacaqlarına hazır olduqlarını bildirdilər. Bu məsələdə Koloradoda yaşayan azərbaycanlıların müraciətlərinin zəruri olduğunu diqqətə çatdırdılar".
Z.Oruc Koloradonu ABŞ Konqresində təmsil edən Reymond Polislə də görüşdüklərini açıqlayıb: "Bu görüşdə ABŞ Konqresinin Dağlıq Qarabağa son yardımının bölgə üçün doğurduğu nəticələri çatdırdıq və bundan narahatlığımızı ifadə etdik. O, bizim narahatlığımızı anlayışla qarşıladı".
Z.Oruc növbəti günlərdə ABŞ dövlət katibinin müavininin köməkçisi Tina Kaydanau və konqresmenlər, senatorlarla görüşlər keçirəcəklərini bildirib.

+  -  Çap