Uqo Çaves təkanları yeni gizli silahın sınaqdan keçirilməsi ilə əlaqələndirib

"Haitidə baş verən dağıdıcı zəlzələ ABŞ-ın yeni gizli silahını sınaqdan keçirməsinin nəticəsidir". Bunu Venesuela prezidenti Uqo Çaves bəyan edib. Bu bəyanatın əks olunduğu material Venesuela dövlət telekanalı "Vive TV"nin saytında yerləşdirilib. Burada göstərilir ki, Haitidə təqribən 140 min insanın həyatına son qoyan zəlzələ ABŞ Hərbi Dəniz Qüvvələri tərəfindən həyata keçirilən sınaqların nəticəsində baş verib. Həmçinin bəyanatda bildirilir ki, Birləşmiş Ştatlar tərəfindən həyata keçirilən təlimlərin məqsədi İslam reyimini devirmək üçün İrana gələcək hücumun hazırlanması olub. Haitidən söz düşmüşkən, ABŞ prezidenti Barak Obama və xanımı Mişel Obama öz şəxsi bank hesablarından Haitidə baş vermiş dağıdıcı zəlzələnin qurbanları üçün 15.000 dollar məbləğində vəsait ayırıblar. "Associated Press" agentliyinin yaydığı xəbərə görə, Ağ Evin nümayəndəsi Coş Ernest bildirib ki, belə bir sərt iqtisadi şəraitdə milyonlarla amerikalıların baş verənləri kənardan seyr etməyərək səxavət nümayiş etdirməsi Obama ailəsini də ilhamlandırıb: "Yanvarın 12-də baş vermiş kütləvi zəlzələdən sonra yüz minlərlə evsiz, ac və çarəsiz qalmış haitililər üçün yardım gəlməkdədir".
Haitidəki dağıntılar eks-prezident Corc Buşu da bərk təsirləndirib. O bildirib ki, bu əzabın görüntüləri ürək ağrıdır. C.Buş Haiti xalqına mesayının olduğunu da deyib: "Dünya boyu insanlar sizin üzləşdiyiniz çətinliklərdən agahdır və həyatlarınız bizim üçün mühümdür". C.Buş haitililəri sakitliyə çağırıb: "Mən Haiti xalqının keçirdiyi hissləri tamamilə anlayıram. Amma ümid edirəm ki, Haiti xalqı bilir ki, bizim hökumətimiz hərbçilər və Birləşmiş Ştatlar Beynəlxalq İnkişaf Agentliyi ilə birgə əlindən gələni edir ki, sizə tez bir zamanda ərzaq, dərman və su çatdırılsın".
Sabiq ABŞ prezidenti vurğulayıb ki, onun narahatlığının səbəbi həm də şəxsidir.
Qeyd edək ki, 2005-ci ildə "Katrina" qasırğası və 2004-cü ildə Hind okeanında sunami kimi nəhəng təbii fəlakətlər Buş prezident olarkən böyük tələfatlara səbəb olmuşdu. Ağ evin keçmiş rəhbəri bu fəlakətlərdən mühüm dərslər öyrəndiyini deyib: "Haiti xalqı tək deyil. Dünya sizi qucaqlaya bilməz, lakin ayaq üstə yenidən durmaq üçün kömək göndərə bilər".


Azər NURİYEV

+  -  Çap