Obama çətin anlarında Allaha sığındığını bəyan edib

Birləşmiş Ştatlar prezidenti Barak Obama bəyan edib ki, Allaha inam çətin anlarda ona güc verir. "Bəzən məndən soruşurlar ki, nə üçün belə sakit görünürəm. Etiraf edim ki, hərdən mən o qədər də sakit olmuram. Elə vaxtlar olur ki, uğurlar elə də əhəmiyyətli görünmür, ünvanıma deyilən sözlər isə məni yaralayır. Mənə elə gəlir ki, bütün səylər boşa gedib, mən öz şübhələrimlə mübarizə aparmalı oluram. Bu vaxt məhz inam mənə sakit qalmaqda kömək edir" - deyə B.Obama Vaşinqtonda Baptist kilsəsində 300 dindar qarşısında bəyan edib. Qeyd edək ki, ABŞ prezidentinin çıxışı qaradərililərin vətəndaş hüquqları uğrunda hərəkatın liderlərindən Martin Lüter Kinqin doğum gününün ildönümü münasibətilə milli bayram ərəfəsində baş tutub. B.Obama bütün dindarları görkəmli təbliğçidən nümunə götürməyə çağırıb. O qeyd edib ki, ağır həyat şəraitlərində inama sığınmağı ondan öyrənib. "Kinq inanırdı ki, Allah çıxılmaz vəziyyətdən çıxış yolu tapmaqda kömək edir" - deyə Amerika prezidenti vurğulayıb. Bu barədə "Christian Post" saytı yazıb.
Qeyd edək ki, kilsədə B.Obama ilə yanaşı onun həyat yoldaşı və iki qızı da olub.

+  -  Çap