1-ci liqa matçlarının yayın hüququnu isə TRT aldı

Bugünlərdə Türkiyə Futbol Federasiyası tərəfindən (TFF) hərraca çıxarılan superliqa oyunlarının yayın paketinin sahibi müəyyən olub. Bu son illər superliqanın oyunlarını yayınlayan "Digiturk" kanalı olub. Beləliklə, önümüzdəki 4 ildə də superliqa matçlarını məhz "Digiturk" paketinə daxil olan "Liq.TV" kanalı yayınlayacaq. TFF-in binasında baş tutan hərrac olduqca maraqlı keçib. Təsadüfi deyil ki, hərrac 4 saat davam edib.
TFF tərəfindən ilkin qiymət kimi 214 milyon 300 min dollar müəyyənləşdirilmişdi. Bundan sonra isə "Türktelekom" şirkəti və "Digiturk" inanılmaz mübarizəsi yaşanıb. Sonda "Digiturk"ün təklif etdiyi 321 milyon dollarla "Telekom"çular da razılaşmaq məcburiyyətində qalıblar. Bununla da superliqa matçlarının yayın hüququ köhnə-yeni sahibinə qovuşub. Qeyd edək ki, superliqa oyunlarının canlı yayınlandığı A paketiylə yanaşı, B və C paketləri də öz yiyəsini tapıb. Maraq üçün qeyd edək ki, B paketinə superliqa matçlarından qısa görüntülər və 1-ci liqa matçlarının canlı yayını daxildir. B paketini TRT, C paketini isə "Türktelekom" alıb.
Hərracdan sonra yurnalistlərin qarşısına çıxan TFF başqanı Mahmud Özgənər bunları deyib: "Bu, inanılmaz rəqəmdir. Bütün bunlar həm də Türkiyə futbolunun inkişafda olduğunu göstərir. "Digiturk"ə təşəkkürümüzü bildiririk. 2000-ci illəri onlarla keçirdik. İndi isə 2010-cu illərin əvvəllərini də onlara keçirəcəyimiz məlum oldu. Yəqin ki, bu cür hərracdan sonra Türkiyə futbolunu tənqid edənlər susacaq. Bütün dünyanı alt-üst edən maliyyə böhrarına rəğmən yayın hüququna görə bu qədər pullar ödənildi. İnanıram ki, gələcəkdə də əl-ələ verərək Türkiyə futbolunun yüksəlməsi üçün çalışacağıq".
Sonda "Digiturk"un rəhbəri Ərtan Özərdən də yurnalistlər qarşısına çıxıb: "Düzünü desəm, bu cür rəqabətin yaşanacağını gözləmirdim. 9 ildir ki, TFF-lə birgə işləyirik. Yəni Türkiyə futbolunun inkişaf etməsi üçün biz də əlimizdən gələni edirik".

+  -  Çap