Mükafatın təqdimatı yaz aylarına gözlənilir

Mədəniyyət və Turizm Nazirliyi teatr, musiqi, təsviri sənət və kino sahəsində ənənəvi "Zirvə" mükafatını təsis edib. Qeyd edək ki, "Zirvə" mükafatı teatr, musiqi, təsviri sənət və kino sahəsində xüsusi xidmətlər göstərən, yüksək peşəkarlıq nümayiş etdirən istedadlı, yaradıcı şəxslərə verilir. Nazirliyin mətbuat əlaqələndiricisinin məlumatında bildirilir ki, bu mükafata aşağıda adları qeyd edilən sənət növləri üzrə yaradılmış əsərlər təqdim oluna bilər: teatr sənəti, musiqi, kinematoqrafiya, memarlıq, heykəltaraşlıq, boyakarlıq, qrafika sahəsində, habelə xəttatlıq, dekorativ və milli tətbiqi sənət növləri üzrə və s. Bundan başqa, layihəyə milli mədəniyyət tarixinin qorunması, zənginləşdirilməsi və inkişafına xidmət edən elmi-nəzəri əsərlər, beynəlxalq, regional və milli səviyyədə mədəniyyətin və incəsənətin inkişafına dair genişplanlı proqramlar və layihələr daxildir. Xəbərdə bildirilir ki, mükafata təqdim edilən namizədlər üçün yaş məhdudiyyəti yoxdur. Mükafat hər biri 5000 manat həcmində veriləcək. Qeyd edək ki, mükafatlar mart ayında Mədəniyyət və Turizm Nazirliyinin əmrinə əsasən, Mükafat Komissiyasının təqdimatı ilə verilir. Qaliblərə rəmzi simvol, diplom və pul mükafatı təqdim olunur. Mükafata təqdimatlar fevral ayının 15-dək teatr-tamaşa, konsert, elmi-tədqiqat müəssisələri, yaradıcılıq təşkilatları tərəfindən göndərilməlidir.

+  -  Çap