Avropadakı Azərbaycanlı Tələbələr və Gənc Mütəxəssislər Forumu növbəti tədbir təşkil edəcək

Avropadakı Azərbaycanlı Tələbələr və Gənc Mütəxəssislər Forumu (FACE) özlərinin növbəti tədbirini təşkil edəcək. FACE-nin məlumatına görə, üç gün davam edəcək forum Belçikanın Brüssel şəhərində keçiriləcək. Forumun əsas məqsədi Avropa strukturları ilə tanış olmaq, Avropa Parlamentinin müxtəlif üzvləri və Avropa Birliyi rəsmiləri ilə görüşlər keçirmək, eləcə də onların bir-birləri ilə qarşılıqlı əlaqələrinə şərait yaratmaqdır. Sözügedən forumda Avropada təhsil alan və çalışan azərbaycanlı gənclər həm Avropa, həm də Azərbaycanın gündəliyində duran Cənubi Qafqazda sabitlik və təhlükəsizlik məsələlərini müzakirə edəcəklər. Azərbaycanın Avropaya inteqrasiyası və Avropanın ən yaxşı təcrübələrinin Azərbaycana gətirilməsi kimi məsələlər forumun əsas müzakirə mövzusudur. Məlumata görə, iştirakçılar forumun tam təfsilatı və proqramı ilə tanış ediləcəklər. FACE iştirakçıların yaşayış və qidalanma (gündə 3 dəfə) xərclərini qarşılayır. Lakin səfər xərclərini onlar özləri ödəməlidirlər. Qurum həmçinin hər hansı bir iştirakçıya viza əldə etmək üçün lazım olan rəsmi məktubla da yardım edə bilər. İştirakçıların seçimi onların forumda iştirakları üçün arqumentləşmə və motivasiya meyarları əsasında keçiriləcək. Forumun işçi dili ingilis dili olduğu üçün iştirakçılardan bu dili yaxşı bilmələri də tələb olunur. Forumda iştirak etmək üçün vətəndaşlar CV-lərini və motivasiya məktubunu qurumun internet ünvanına göndərməlidirlər.


HƏQİQƏT

+  -  Çap