"Ötən ilin son üç ayının verilməyən ünvanlı sosial yardımlar bu ilin yanvarından ödənməyə başlanacaq. Bu vəsaitlər dövlət büdcəsindən ayrılacaq". Bunu APA-ya açıqlamasında Milli Məclisin Sosial siyasət komitəsinin sədri Hadı Rəcəbli bildirib. Komitə sədri deyib ki, ünvanlı sosial yardımların verilməsi ilə bağlı mövcud təlimatlar daha çox insanın kasıb kimi müəyyənləşdirilməsinə rəvac verir. Onun sözlərinə görə, ötən il proqnozlaşdırılan rəqəmlər sonrakı təlimatlarla düz gəlmir: "Bu gün Azərbaycanda kasıblığın həddi kəskin aşağı düşüb. Ona görə də proqnozların müəyyənləşməsində təlimatın təkmilləşməsinə ehtiyac var. Düşünürəm ki, Dünya Bankının təcrübəsi nəzərə alınmaqla aparılan təkmilləşmə ünvanlı sosial yardım alan kontingentin sayını azaldacaq". Komitə sədri sosial müdafiənin bir sistemdən digər sistemə keçdiyini diqqətə çatdırıb: "Bu, transformasiya prosesidir. Yəni vaxtilə uşaq pulu deyilən məfhum ünvanlı sosial yardımla əvəz olunub. Burada məqsəd ünvanlılığın təmin olunmasıdır. Ünvanlılığı təmin etmək üçün isə kimlərin kasıb hesab olunması ilə bağlı əsasnamə müəyyənləşdirdilər. Bu əsasnamə 17 maddədən ibarət idi. Zaman-zaman bu maddələr təkmilləşdirildi. Bu proses davam etdirilməlidir".
H.Rəcəbli, həmçinin bu kontekstdə əhalinin az təminatlı hissəsi ilə işləyən Əmək və Əhalinin Sosial Müdafiəsi Nazirliyinin çox ağır bir işlə məşğul olduğunu deyib: "Adamlarla üzbəüz qalmaq ağır məsələdir".

+  -  Çap