Azərbaycanda respublika əhəmiyyətli avtomobil yollarını ağır tonnaylı yük maşınlarının təsirlərindən qorumaq üçün tərəzilərin qurulması planlaşdırılır. Bu barədə "APA-Economics"ə "Azəryolservis" ASC-nin mətbuat katibi Pünhan Mürsəliyev məlumat verib. Onun sözlərinə görə, hazırda yalnız bir yerdə - Ələt-Masallı-Astara yolunun üzərində tərəzi qurulub. Bakı-Qazax, Bakı-Rusiya sərhədi avtomobil yolunun, eləcə də bir neçə digər istiqamətlərdə də tərəzilərin qoyulması nəzərdə tutulur. "Tərəzilər yolların müxtəlif hissələrində olacaq. Burada məqsəd yolların qorunmasına nəzarəti həyata keçirməkdir" - deyə P.Mürsəliyev vurğulayıb.
Hazırda respublika əhəmiyyətli yolların müxtəlif hissələrində nəqliyyat vasitələrinin hərəkətinə, yük normativlərinə əməl-etməməsinə nəzarət məqsədilə monitorinqlər aparılır. "Azəryolservis" rəsmisi onu da bildirib ki, normativindən artıq yüklənmiş nəqliyyat vasitələri yolların və körpülərin tez sıradan çıxmasına şərait yaradır. Bəzi hallarda sürücülər yol təhlükəsizlik müfəttişlərinin saxlama tələblərinə məhəl qoymayaraq hərəkətlərini davam etdirirlər.
P.Mürsəliyev əlavə edib ki, ötən il ağır, normadan artıq yüklənmiş maşınların təsirindən Kür çayı üzərində (Şirvan şəhəri ilə Sabirabad rayonları arasında), Akuşka çayı (Salyan) üzərindəki körpülər, həmçinin Bakı-Qazax yolu üzərindəki 2 körpü sıradan çıxıb. Bu il yanvarın 26-da isə Ələt-Bəhrəmtəpə-Horadiz yolunun üzərində, Saatlı rayonunda bir körpüdə qəza vəziyyəti yaranıb, həmin yolun üzərindəki ikinci bir körpüdə də təhlükəli vəziyyət aşkarlanıb.

+  -  Çap