Elmar Məmmədyarovu əmir Şeyx Hamad bin Xalifə Al-Tani qəbul edib

Qətər dövlətinin əmiri Şeyx Hamad bin Xəlifə Al-Tani bu ölkədə səfərdə olan Azərbaycanın xarici işlər naziri Elmar Məmmədyarovu qəbul edib. E.Məmmədyarov Azərbaycan prezidentinin məktubunu əmirə təqdim edib. Məktubda iki dövlət arasında əməkdaşlıq əlaqələri və müştərək maraq doğuran məsələlərdən bəhs olunub. E.Məmmədyarov Qətərin baş naziri və xarici işlər naziri Şeyx Həmd ibn Casim ibn Cabarla da görüşüb.
"Azərbaycanın qaz ehtiyatı hazırda 2 trilyon kubmetr həcmində qiymətləndirilir. Bu rəqəm 5 trilyona qədər arta bilər". Bu sözləri xarici işlər naziri Elmar Məmmədyarov "Al-Yazeera" telekanalına müsahibəsində bildirib. Nazir eneryi sahəsində əməkdaşlıq məsələsinə toxunaraq Azərbaycanın qonşu ölkələrlə fəal işlədiyini və Avropa ilə qaz əməliyyatlarını genişləndirməyi planlaşdırdığını vurğulayıb. "Bizə qiymət diktə edən qonşularımız yoxdur" - deyə nazir bildirib. Onun sözlərinə görə, Azərbaycanla Rusiya arasında eneryi sahəsində əməkdaşlıq onilliklərlə ölçülür. "Bundan başqa bizim İrana qaz satışı barədə razılaşmamız var. Biz Türkiyə ilə ildə 4 milyard kubmetr qaz satışı barədə danışıqlar aparırıq. Avropa İttifaqına qədər qaz satışınının miqyasının artırılması ilə bağlı da danışıqlar aparılır" - deyə nazir bildirib.
Səfər çərçivəsində E.Məmmədyarovun Qətərin maliyyə və iqtisadiyyat naziri Yusif Hüseyn Kamal, Qətər Dövlətinin əmiri Şeyx Hamad bin Xəlifə Al-Tani, Qətər İnformasiya Birliyinin prezidenti, Qətər Əmirinin informasiya məsələləri üzrə müşaviri Şeyx Hamad bin Samir Al-Tani və "Al-Diyar Al-Qatari" şirkətinin icraçı direktorunun əməliyyatlar üzrə müavini İsa Al-Fadala ilə də görüşüb. Qətər Dövlətinin əmiri Şeyx Hamad bin Xəlifə Al-Tani ilə görüşdən sonra isə "Azərbaycan Respublikası Hökuməti və Qətər Dövləti Höküməti arasında diplomatik və xüsusi pasportlara malik şəxslərin viza tələblərindən azad olunmaları haqqında Saziş"in imzalanma mərasimi keçirilib.
Azərbaycan Beynəlxalq Bankı Qətərdə filial açmaq niyyətindədir. APA-nın məlumatına görə, bu barədə xarici işlər naziri E.Məmmədyarov bu ölkənin "Əl-raya" qəzetinə müsahibəsində bildirib. Nazir Azərbaycanla Qətər arasında birbaşa təyyarə reyslərinin təşkil olunması planının da olduğunu qeyd edib.


Kamran

+  -  Çap