Azərbaycanın 19 yaşadək qızlardan ibarət yığmasının nəticələri ləğv edildi

UEFA Azərbaycanın 19 yaşadək qızlardan ibarət milli komandasında süni yaş azaltma ("lipa") prosesi ilə bağlı araşdırmaları başa vurub. Apasport.az-ın AFFA-nın rəsmi saytına istinadən məlumatına görə, beynəlxalq futbol qurumu sərt cəza qərarı çıxarıb.
UEFA-nın Nəzarət və İntizam Komitəsinin U-19 yığmamız barədə aşağıdakı qərarları qəbul edib:
1. 19 yaşadək qızlardan ibarət komandalar arasında Avropa çempionatının ilkin seçmə mərhələsi çərçivəsində 19 - 24 sentyabr aralığında keçirilmiş İspaniya - Azərbaycan, Azərbaycan - Ukrayna və Kipr - Azərbaycan oyunlarının nəticəsi ləvğ olunsun. Hər üç oyunda Azərbaycan yığmasına 0:3 hesablı texniki məğlubiyyət verilsin.
2. Futbolçular İna Boyko, Toma Besserdeçnaya, Olqa Qazıyeva, Olqa Səfərova, Natalya Suvorovtseva və Anastasiya Rəhmanova 30.11.2010-cu ilədək müddətə ölkədaxili və beynəlxalq oyunlardan diskvalifikasiya olunsun. 3. Azərbaycan Futbol Federasiyaları Assosiasiyası futbolçulara bu barədə məlumat versin.
4. Azərbaycan Futbol Federasiyaları Assosiasiyası 60.000 (altmış min) avro məbləğində cərimə olunsun.
5. 19 yaşadək qızlardan ibarət Azərbaycan yığması 2010 və 2011-ci ildə keçiriləcək Avropa çempionatı oyunlarından kənarlaşdırılsın. 2011-ci ildən sonrakı növbəti 3 il sınaq dövrü təyin olunsun.
Qeyd edək ki, U-19 Avropa çempionatının elit raunduna vəsiqə qazanmasına baxmayaraq, AFFA rəhbərliyi "Fair play" ("Ədalətli oyun") qaydalarını və rəqibə hörmət prinsiplərini əsas götürərək, qarşıdakı yarışdan imtina edib. AFFA-nın atdığı bu addımın futbol tarixində analoqu yoxdur. Belə ki, indiyədək yalnız rəqib komandanın şikayətindən və ya yarış təşkilatçılarının şübhələrindən sonra "lipalar" üzə çıxırdı və heç kim öz günahını boynuna alıb, beynəlxalq futbol qurumlarını bu haqda xəbərdar etmirdi.
AFFA qərara dərhal reaksiya verib. Qadın Futbol Federasiyasının prezidenti səlahiyyətlərini icra edən Asim Xudiyev tutduğu vəzifədən istefa verib. Apasport.az-ın AFFA-nın rəsmi internet saytına istinadən yaydığı məlumata görə, 2007-ci ilin noyabrında səlahiyyət müddəti başa çatan, lakin bu vəzifələri icra edən veteran futbolçu qadın futbolundan uzaqlaşmağa qərar verib.
Buna 19 yaşadək qızlardan ibarət Azərbaycan milli komandasının heyətində saxtakarlığın baş alıb-getməsi, birdən-birə 6 futbolçunun "lipa" çıxması səbəb olub.
AFFA "lipalaşdırma"ya görə daha 2 nəfəri də işdən çıxarıb.
Belə ki, milli komandadan iki rəsmisi işdən azad olunub, daha bir nəfərə isə xəbərdarlıq edilib. Qərara əsasən, komandanın rəisi Telman Abdullayev ilə müqavilənin müddəti artırılmayıb.
Komandanın koordinatoru Bəhruz Əsgərovla da müqavilə ləğv olunub.
Baş məşqçi Şamil Heydərov isə yığmanın baş məşqçisi vəzifəsini müvəqqəti icra edəcək.
Komandanın inzibatçısı Aydın Məhərrəmova da ciddi xəbərdarlıq elan olunub.

+  -  Çap