Parlamentin keçmiş spikerinin maşınını atəşə tutublar

İranda müxalifət liderlərindən biri, parlamentin keçmiş spikeri və prezidentliyə keçmiş namizəd Mehdi Kərrubiyə sui-qəsd olub. "France Presse" agentliyinin yaydığı məlumata görə, hadisə Qəzvin şəhərində baş verib. Kərrubi etiraz aksiyalarında ölənlərin matəm mərasimində iştirak etmək üçün bu şəhərə gəlib. Amma onun içində olduğu evi yaxınlıqdakı kəndlərdən gətirilmiş yerli sakinlər və BƏSİC könüllüləri mühasirəyə alıb.
Onlar evi daş atəşinə tutublar və pəncərələri sındırıblar. Hadisədən ancaq 4 saat sonra olay yerinə gələn polis Kərrubini binadan çıxarıb və avtomobilinə aparıb. Amma avtomobil yola düşəndə onu odlu silahdan atəşə tutublar. Maşına neçə güllə atıldığı bilinmir. Agentlik qeyd edir ki, avtomobil zirehli olduğundan, Kərrubiyə heç nə olmayıb. Kərrubi bildirib ki, onun mühafizəçiləri cavab atəşi açmayıblar. Çünki bu halda onlara qarşı dərhal cinayət işi başladıla bilərdi. Cinayətkarlar Kərrubinin maşınını izləməyiblər.

+  -  Çap