Filmdə Hollivudun qrim ustaları da çalışacaqlar

Azərbaycan və Türkiyə mədəniyyət nazirlikləri arasında müştərək film çəkilməsi ilə bağlı müqavilə imzalanıb. Film Elçin Əfəndiyevin "Mahmud və Məryəm" əsərinin ssenarisi əsasında çəkiləcək.
Filmin çəkilişləri Türkiyənin tanınmış prodüseri Sevda Kayqısıza həvalə edilib. Belə ki, əvvəlcə müsabiqə təşkil olunub. 500 layihənin içindən Sevda Kayqısızın "Mahmud və Məryəm" layihəsi qəbul edilib.
Qeyd edək ki, mart ayından filmin hazırlıqları başlanacaq. Filmin musiqisi bəstəkar Aygün Səmədzadəyə həvalə edilib. Çəkilişlərə isə may ayından start verilməsi planlaşdırılıb. Sözügedən filmdə Azərbaycanın və Türkiyənin tanınmış aktyorları rol alacaqlar. Baş rol Qəmər Banu obrazını Türkiyədə yaşayan aktrisamız Məlahət Abbasova oynayacaq.
"Mahmud və Məryəm" əsəri fantastik yanrda olduğundan reyissorun Bollivuddan gətirilməsi nəzərdə tutulub. Bollivud reyissorlarının ssenari ilə tanış olması üçün əsər ingilis dilinə tərcümə olunub.
Filmdə aktyorların qrimi ilə məşğul olan ustalar da Hollivuddan dəvət olunacaq. Qeyd edək ki, filmin çəkilişlərinin 80 faizinin Azərbaycanda aparılması nəzərdə tutulub. Filmdə baş rolu oynaycaq Məlahət Abbasova isə eyni zamanda prodüser Sevda xanımın köməkçisi olacaq.

+  -  Çap