Cinayət əməlindən zərər çəkənlərdən ikisi qadın olub

Hüquq-mühafizə orqanları üç quldurluq faktının üstünü açıb. DİN-in mətbuat xidmətindən "Kaspi"yə verilən məlumata görə, Sumqayıt ŞPİ əməkdaşlarının keçirdikləri əməliyyat-axtarış tədbirləri nəticəsində şəhər sakininə zor tətbiq edərək ondan mobil telefon alan şəxs tutulub. Saxlanılan Z.Tağıyev qəsəbəsinin sakini Fərid Səmədovdur. F.Səmədov həmyerlisi Səadət Abbasovaya qarşı zor tətbiq edərək mobil telefonunu ondan almaqda təqsirləndirilir. Yevlax RPŞ əməkdaşlarının keçirdikləri əməliyyat-axtarış tədbirləri nəticəsində isə Arzu Haqverdiyevə qarşı quldurluq edən cinayətkar qrupun digər üzvləri yaxalanıb. Saxlanılanlar Yevlax rayon sakinləri Qurban Əliyev və Rüfət Rüstəmlidir. Belə ki, yanvarın 2-də Yevlax rayonunda Mingəçevir şəhər sakini Arzu Qurban Əliyevin idarə etdiyi "Hyundai" markalı avtomaşına sərnişin qismində oturub Mingəçevir şəhərinə gedəcəyini bildirib. Salahlı kəndində Q.Əliyevlə birgə olan digər sərnişin A.Haqverdiyevi bıçaqla hədələyərək 96 manatını və mobil telefonunu ondan alıb. Yevlax RPŞ əməkdaşlarının keçirdikləri əməliyyat-axtarış tədbirləri nəticəsində hadisədən dərhal sonra Q.Əliyev tutulub.
Gəncə şəhərində 3 naməlum şəxs şəhər sakini Rəna Süleymanovaya qarşı zor tətbiq edərək içərisində 160 manatı və sənədləri olan çantasını ondan alıblar. Kəpəz RPŞ əməkdaşlarının keçirdikləri əməliyyat-axtarış tədbirləri nəticəsində hadisəni törədənlərdən Gəncə şəhər sakinləri Vəli Hüseynov və Cavad Vəliyev saxlanılıb. Hər üç faktla bağlı araşdırmalar aparılır.

+  -  Çap