Modelin öyrənilməsi Dünya Bankı tərəfindən keçid dövrü ölkələrinə tövsiyə olunub

Dünya Bankı (DB) Azərbaycanın sığorta-pensiya sistemində aparılan islahatlar və qurulan yeni modelin öyrənilməsini keçid dövrü ölkələrinə tövsiyə edib. Hazırda bankın Əfqanıstan üzrə layihəsi çərçivəsində ölkəmizdə sığorta-pensiya sistemində həyata keçirilən və beynəlxalq etimad qazanan islahatlarla tanış olmaq məqsədi ilə Əfqanıstanın nümayəndə heyətinin Azərbaycana səfərə başlayıb. Nümayəndə heyətinin tərkibinə Dünya Bankı ekspertləri, Əfqanıstanın Əmək, Sosial İşlər, Şəhidlər və Əlillər Nazirliyinin rəhbər şəxsləri, o cümlədən bu ölkənin Maliyyə Nazirliyinin, Müstəqil Administrativ İslahat və Dövlət Qulluğu üzrə Komissiyasının əməkdaşları daxildir. Bu barədə qəzetimizə Dövlət Sosial Müdafiə Fondunun (DSMF) ictimaiyyətlə əlaqələr sektorundan məlumat verilib. Mənbədən bildirilib ki, qonaqlar dünən DSMF sədri Səlim Müslümovla görüşüblər. Nümayəndə heyətini fondun fəaliyyəti ilə yaxından tanış edən S.Müslümov vurğulayıb ki, artıq Azərbaycanda beynəlxalq standartlara uyğun sığorta-pensiya sistemi yaradılıb. Fond rəhbəri ölkədəki geniş spektrli islahatların tərkib hissəsi kimi sığorta-pensiya sisteminin yenidən qurulması və davamlı inkişafına nail olunması üçün indiyə qədər görülən işlər barədə də qonaqları məlumatlandırıb. S.Müslümov fərdi uçot sistemi, sığorta-pensiya sistemində hüquqi və fiziki şəxslərin qeydiyyatı, sosial qanunvericilik və s. məsələlərlə bağlı qonaqları maraqlandıran sualları da cavablandırıb.
Səfər dekabrın 27-nə qədər davam edəcək. Bu müddətdə Azərbaycanda olacaq nümayəndə heyətinə DSMF-də tətbiq olunan informasiya idarəetmə, fərdi uçot, maliyyə idarəetmə sistemləri, qanunvericilik, sosial sığorta haqlarının toplanması və s. məsələlərlə bağlı məlumatlar veriləcək. DSMF-nin ayrı-ayrı rayon şöbələrinin iş şəraiti ilə yaxından tanış olmaq üçün qonaqların Azərbaycanın bir sıra rayonlarına səfərləri də nəzərdə tutulur.

HƏQİQƏT

+  -  Çap