Mədəniyyət və turizm naziri Əbülfəs Qarayev İmadəddin Nəsimi yaradıcılığına həsr olunmuş II Beynəlxalq Nəsimi Elmi Konfransında iştirak edən Hələb nümayəndə heyətini qəbul edib. APA-nın məlumatına görə, nazir Suriya ilə Azərbaycan arasında əlaqələrin daha da genişlənməsinin vacibliyini vurğulayıb. O, Hələb şəhərində Nəsiminin məqbərəsinin bərpası ilə bağlı razılıq əldə edildiyini və bununla bağlı bir neçə layihə hazırlanacağına qərar verildiyini deyib. Ə.Qarayev bildirib ki, beynəlxalq konfransdakı məruzələr kitab şəklində həm Azərbaycan, həm də ərəb dilində çap olunacaq. Nazirin sözlərinə görə, Nəsiminin məqbərəsinin Hələbdə yerləşməsi Azərbaycanla Suriya arasında əlaqələrin daha da inkişafına xidmət edir. Hələb qubernatorunun mədəniyyət məsələləri üzrə müavini Məhəmməd Qəccə isə Bakıda özlərini ölkələrindəki kimi hiss etdiklərini diqqətə çatdırıb: "Biz Nəsiminin qəbrini iki ölkə arasındakı əlaqələrdə körpü kimi görürük. Məqbərənin Azərbaycan tərəfindən bərpası çox gözəl addımdır".

+  -  Çap