Qənirə Paşayeva: "Ağlamaqla problemlər həllini tapmayacaq"

"2010-cu il Xocalı ili elan oluna bilər". Bu barədə Türkiyənin Bursa şəhərində keçirilən "Yaxın tariximizdə türk və müsəlman soydaşlarımızın məruz qaldığı insan haqları məsələləri" ilə bağlı simpoziumda millət vəkili Qənirə Paşayeva məsələ qaldırıb. Bu məsələ 50-dən artıq ölkənin 200-ə yaxın nümayəndəsinin iştirak etdiyi tədbirin yekun Bəyannaməsində də əksini tapıb. Q.Paşayevanın sözlərinə görə, Bəyannamədə tədbir iştirakçılarının irəli sürdükləri bütün məsələlər nəzərə alınıb: "Bizim təkliflərimiz də yekun sənəddə əksini tapdı. Ötən əsrin 80-ci illərinin sonlarında Ermənistandan deportasiya olunmuş 300 minə yaxın soydaşımızın pozulmuş hüquqları, tarixin müxtəlif dönəmlərində ermənilərin azərbaycanlılara qarşı törətdikləri soyqırımıları və sair məsələləri qaldırdıq. 2010-cu ilin Qarabağ, Xocalı ili elan edilməsi, bununla bağlı türk və müsəlmanların yaşadıqları ölkələrdə aksiyaların, yürüşlərin keçirilməsi də təkliflərimiz sırasında idi. Bəyannamədə bu məsələlərin hamısı əks olundu". Q.Paşayeva hesab edir ki, "Yaxın tariximizdə türk və müsəlman soydaşlarımızın məruz qaldığı insan haqları məsələləri" ilə bağlı simpozium türk dünyası, müsəlman aləminin üzləşdikləri problemlərin beynəlxalq sferaya çıxarılmasında əhəmiyyətli olacaq: "Tədbirdə qeyd edildi ki, iştirakçılar geri döndükdən sonra əməli işə başlamalıdırlar. Mən də hesab edirəm ki, ağlamaqla problemlər həllini tapmayacaq. Bu barədə Azərbaycan prezidenti İlham Əliyevin irəli sürdüyü "müdafiə mövqeyindən hücuma keçməliyik" fikri bütün türk dünyası üçün tezis olmalıdır".
Deputat onu da qeyd edib ki, türk dünyasının, müsəlman aləminin Azərbaycandan böyük gözləntiləri var: "Simpoziumda çıxış edənlərin əksəriyyəti Azərbaycandan dəstək istəyirdilər. Özümüzün üzləşdiyimiz Qarabağ probleminə rəğmən türk, müsəlman qardaşlarımız bizdən kömək umurlar. Bu məni xeyli qürurlandırdı. Bu, Azərbaycanın türk dünyasındakı nüfuzu ilə bağlıdır. Təbii ki, Azərbaycanın mövqeyi zəif olsaydı, bizdən belə ummazdılar".


İ.QULİYEV

+  -  Çap