Göyçay rayonunda mikroavtobusla minik avtomobili toqquşub. APA-nın məlumatına görə, hadisə yanvarın 16-da saat 17.00 radələrində Ucar-Göyçay yolunda, Göyçay rayonunun Xəlilli kəndi ərazisində baş verib. Ucar-Göyçay marşrutu üzrə hərəkət edən “RAF” markalı, 10 LC 289 dövlət nömrə nişanlı mikroavtobusla 10 TM 371 dövlət nömrə nişanlı, “QAZ 3110” markalı avtomobil toqquşub.

Nəticədə “QAZ 3110”un sürücüsü, Göyçay rayon sakini Musayev Sadiq Asif oğlu və “RAF”ın sürücüsü, Göyçay rayon sakini Hacıyev Azər Ağəli oğlu xəsarət alıblar. Hər iki sürücü Göyçay Mərkəzi rayon Xəstəxanasına yerləşdirilib.
Faktla bağlı araşdırma aparılır.

+  -  Çap