2011-ci il ərzində Dövlət Sosial Müdafiə Fondunun Beynəlxalq əlaqələr şöbəsinə xarici ölkələrin sığorta-pensiya qurumları, əcnəbi vətəndaşlar və xaricdə yaşayan Azərbaycan Respublikası vətəndaşları tərəfindən daxil olan müraciətlərin sayı ötən 2010-ci illə müqayisədə 3  faiz artıb.

Fondun mətbuat xidmətindən verilən məlumata görə, ötən il ərzində quruma daxil olan 1916 müraciət arasında MDB ölkələrindən ünvanlanan müraciətlər üstünlük təşkil edib. Qeyd olunan dövr ərzində MDB ölkələrindən 1407 müraciət göndərilib. Bu müraciətlərin mövzusu vətəndaşların pensiya hüququnun təmin edilməsi ilə bağlı zəruri hesab olunan müvafiq rəsmi sənədlərin hazırlanaraq təqdim olunması, konkret hallar üçün zəruri ikitərəfli münasibətlərin tənzimlənməsindən ibarətdir.


Müraciətlərin sayına görə növbəti yerdə isə Türkiyə Çümhuriyyəti gəlir və qardaş ölkədən Fonda 142 müraciət ünvanlanıb. Bu müraciətlərin mövzusu Türkiyə və Azərbaycan respublikaları arasında sosial müdafiə sahəsində ikitərəfli sazişə uyğun olaraq vətəndaşların sosial sığorta və pensiya hüquqlarının gerçəkləşdirilməsi məqsədi ilə konkret tədbirlərin görülməsi istiqamətindədir. DSMF-yə daxil olan digər 367 müraciət isə ayrı-ayrı xarici ölkələrin payına düşür.

+  -  Çap