Mətbuat Şurasında tələbə problemlərinin KİV-də işıqlandırılması məsələlərinə dair dəyirmi masa keçirilib. Şuradan APA-ya verilən məlumata görə, ölkədə fəaliyyət göstərən aparıcı tələbə təşkilatlarının təmsilçilərinin, MŞ İdarə Heyəti üzvlərinin və qəzet baş redaktorlarının qatıldıqları tədbiri açan şura sədri Əflatun Amaşov KİV-də tələbə problemlərinin işıqlandırılması sahəsindəki mövcud vəziyyətdən danışıb. Onun fikrincə, tələbələr daha çox təşkilatlanmalı və media ilə əlaqələrini gücləndirməyə çalışmalıdır.
Azərbaycan Tələbələr Birliyinin sədri Elnur Aslanov rəhbərlik etdiyi qurumun məhz bu zərurətdən irəli gələrək fəaliyyət göstərdiyini diqqətə çatdırıb. "Olaylar" qəzetinin baş redaktoru və eyni adlı informasiya agentliyinin baş direktoru Yunus Oğuz rəhbərlik etdiyi KİV-də bu istiqamətdə təşəbbüslərə geniş yer verməyə hazır olduğunu bildirib.
Tədbirdə çıxış edən müxtəlif tələbə təşkilatlarının rəhbərləri KİV-lə münasibətlərdə qarşıya çıxan çətinliklər və pozitiv məqamlar haqqında danışıblar.

+  -  Çap