Türkiyə hamı ilə dostluq etmək istəyir

Türkiyənin xarici işlər naziri Əhməd Davudoğlu ölkəsinin xarici siyasəti barədə BBC-yə eksklüziv müsahibə verib. Qərblə İran arasında vasitəçiliyi mühüm saydığını bildirən nazir ölkəsinin Əfqanıstan, Qafqaz, İran və Yaxın Şərqə dair yürütdüyü siyasət barədə ətraflı məlumat verib. BBC müxbiri Coni Daymondun "Türkiyə Qafqazlarda və başqa yerlərdə fəallaşmaqla yeni Osmançılıq siyasəti həyata keçirirmi" sualını cavablandıran nazir Əhməd Davudoğlu deyib ki, Türkiyə Qafqazlarda tam sabitliyə nail olmaq istəyir: "Tam, əhatəli sabitliyə. Cənubi Qafqazda dondurulmuş münaqişələrin həllini istəyirik. Biz bunu regionda aparıcı qüvvə olmaq üçün, bəzilərinin dediyi kimi, yeni osmançılıq xətrinə etmirik. Türkiyəyə sabit, təhlükəsiz, firavan mühit lazımdır. Bizim milli marağımız bundan ibarətdir".
Qeyd edək ki, çoxları bu qənaətdədir ki, Davos zirvə toplantısından sonra və sonrakı aylarda Türkiyənin İsraillə münasibətləri geriyə doğru istiqamət götürüb. Türkiyənin İran və digər ölkələrlə daha fəal siyasət aparmağa, onlarla yaxınlaşmağa başladığı bildirilir. Bəs görəsən, bunun arxasında hansı strategiya durur? Ə.Davudoğlu hesab edir ki, bu, səhv qavramadır: "Bizim xarici siyasət gələcəyi necə gördüyümüzə əsaslanır. Bizim Yaxın Şərq, Balkanlar, Qafqazlara dair fikirlərimiz var. Firavan, təhlükəsiz olmaq üçün ölkəyə, ələlxüsus da bizim region kimi qeyri-sabit yerdə, sabit və təhlükəsiz qonşular lazımdır. Son 6 ildə biz mütəmadi olaraq qonşularımızla sıfır problem siyasəti yürüdürük. Bu işdə böyük uğurlar əldə etmişik. Hazırda bizim bütün qonşularla yaxşı münasibətlərimiz var. Yeni modellər üzərində işləyirik. İndi də Ermənistanla münasibətləri normallaşdırmaq barədə protokol imzalamışıq. Əlbəttə ki, Azərbaycanla gözəl münasibətlərə malikik. Eyni baxışı biz Yaxın Şərqə yanaşmamızda da həyata keçiririk. İsraillə də elədir. Ötən il bu vaxt biz İsrail və Suriya arasında vasitəçilik edirdik. Bizim bütün tərəflərlə əla əlaqələrimiz olacaq".
Ə.Davudoğlu Türkiyənin Qərblə, Qərbin problemi olan ölkələrlə, ələlxüsus da İranla siyasətində vasitəçi rolunu oynamağa çalışması barədə də sualı cavablandırıb. O, Türkiyənin İranın nüvə materiallarını öz ərazisində saxlamaq təklifinin Tehran tərəifndən rədd olunmasına da toxunub. "Belə məsələ ortaya çıxanda, yalnız dinc yollarla çözümün tərəfdarıyıq. Buna görə, Türkiyə bu vasitəçilik səylərində fəallıq göstərir. Biz regionda vasitəçilik işlərində təcrübəliyik. Bu danışıqların 60 faizi psixoloyi xarakterlidir. Əsas etimaddır, bu olmasa, nəyin müzakirə edildiyinin əhəmiyyəti azalır. Təəssüf ki, hal-hazırda etimad yoxdur" - deyə nazir bildirib. O əlavə edib ki, Türkiyə əsas məqsədə nail olunması üçün bunun üzərində işləyir: "Mən hələ də nikbinəm. Hamı bilir ki, bu məsələ böyük problemlər yarada bilər və hamı bilir ki, Türkiyə bu prosesi davam etdirmək üçün böyük səylər göstərib".

Azər NURİYEV

+  -  Çap