"Mançester Siti" dalbadal 7-ci bərabərlikdən sonra liderlər qrupundan aralı düşüb

"Mançester Siti" İngiltərə çempionatında son 7 oyununun hamısını heç-heçə başa vurmaqla liderlər qrupundan əhəmiyyətli dərəcədə aralı düşüb. "Şəhərlilər" hazırda lider "Çelsi"dən 14, 2-ci sıradakı "M.Y."-dən isə 9 xal geri qalır. Buna rəğmən, baş məşqçi Mark Hyuz heç-heçələrin sıralanmasını heç də faciə kimi dəyərləndirmir. Preymer Liqanın "Hall Siti" ilə son ev oyununda 1:1 hesablı "sülh"ə razılaşan komanda bu gedişlə çempionluq yarışına çətin ki, qoşulsun. Hyuzun son mətbuat konfransında səsləndirdiyi fikirlərə görə, uelsli məşqçinin nikbinliyini itirmədiyini zənn etmək çətin deyil: "Komandamızda heç bir ciddi problem yoxdur. Əlbəttə, üzərimizdəki təzyiqlər bir qədər də artıb. Ürəkaçan nəticələr qazanmalı olduğumuzu bilirik. Axı komandanın ambisiyaları yetərincə yüksəkdir. Hazırda 7-ci sırada qərar tutsaq da, liderlər qrupundan çox da aralı düşməmişik. Odur ki, çox da həyəcanlanmağa dəyməz. İndi qarşıda bizi iki çətin oyun gözləyir. Çərşənbə günü ("M.S." Liqa kubokunun 1/4 finalında "Arsenal"la qarşılaşacaq) uğurlu nəticə əldə etsək, "Çelsi" ilə şənbəyə planlaşdırılan növbəti oyuna əla forma və motivasiyada çıxacağıq".
Məlumunuz olsun ki, "M.S." yay "transfer pəncərəsi" dövründə dünyanın ən fəal klublarından biri olmuşdu. Rəhbərlik heyətə bir çox tanınmış futbolçular cəlb etmişdi. "Şəhərlilər" mövsümün ilk oyunlarında çox gözəl nəticələrə imza atsa da, sonradan Premyer Liqanın ən "sülhpərvər" komandasına çevrilib. Maraq üçün qeyd edək ki, onların əsas problemi elə bundadır. "M.S." hazırda Premyer Liqada hamıdan az - yalnız bir dəfə məğlub olub.
Hyuz nikbinliyini itirməsə də, rəhbərlik artıq adekvat addım atmağa başlayıb. Britaniyadan gələn xəbərlərdə klubun ərəb sahiblərinin artıq Roberto Mançini ilə təmas qurduğu bildirilir. Onların italyan məşqçiyə rəsmi təklif irəli sürdüyünü və səbəbkarın məlum məsələ haqda düşünmək üçün möhlət istədiyi də söylənilir. Bəzi mənbələr Mançininin hətta həftəsonu "M.S."-nin "sükanı arxasında" görünə biləcəyini də iddia edir.

+  -  Çap