Özəl universitetlər tələbə cəlb etmək üçün çalışır
Yekunlaşmaqda
olan tədris ili üzrə ölkənin ali təhsil müəssisələrinə qəbul üçün yerlər
ayırmış 43 ali məktəbdən 39-da plan yerləri tam dolmamışdı. Məsələn,
"Odlar Yurdu" Universitetində yerlərin cəmi 11.33%-i, Qərb
Universitetində 25.05%-i, Azərbaycan Kooperasiya Universitetində 36.07%-i,
"Azərbaycan" Universitetində 45.38%-i, Elm və Təhsil Mərkəzi "Təfəkkür"
Universitetində 44.21%-i, Bakı Avrasiya Universitetində 49.22%-i, Bakı Biznes
Universitetində isə 59.50%-i dolmuşdu."Təfəkkür”
Universiteti bu ilin əvvəlində bağlandı. Amma digər universitetlər fəaliyyətlərini
davam etdirirlər. Lakin davam etdirmək üçün həm də tələbə olmalıdır. Əgər tələbə
gəlmirsə, universitetin fəaliyyət göstərməsi də mümkün deyil. Bəs ötən il tələbə
qıtlığı yaşayan özəl universitetlər bu il onları cəlb etmək üçün hansı işlər
görürlər? Onlardan biri təhsil haqlarının yüksək olmasıydı ki, bəzi özəl
universitetlər endirim etdilər. Bəs universitetlər bu il üçün tələbələrə daha nə
vəd edirlər?
Birinci kursdan etibarən təhsil haqqının hissə-hissə
ödəmək olar
"Odlar Yurdu" Universitetinin İctimaiyyətlə
əlaqələr və nəşrlər departamentinin direktoru Elçin Əhmədov "Kaspi”yə açıqlamasında bildirdi ki, tələbələrin əsas
diqqət yetirdiyi məsələ təhsil haqqıdır və universitet bu cəhətdən mümkün olan
şəraiti yaratmağa çalışır: "Yarandığı vaxtdan indiyə qədər "Odlar Yurdu”
Universiteti təhsil haqqında müəyyən güzəştli addımlar atır. Birinci kursdan
etibarən təhsil haqqının hissə-hissə ödənilməsinə şərait yaradılır. Digər
universitetlərdə isə birinci kursda təhsil haqqı tam tələb edilir, növbəti illərdə
hissə-hissə ödəmələrinə şərait yaradılır. Bizdə bu il təhsil haqqında endirim
edilib. Ötən il 3000 manat olan təhsil haqqı bu il 2000 manata endirildi. Dövlət
sifarişi ilə də tələbələrimiz qəbul olunacaq. Psixologiya, dizayn, turizm və
otelçilik kimi yeni ixtisaslarımız da olacaq. Bundan əlavə, yüksək bal toplayan
tələbələr təhsil haqqından tam azad olunurlar. Yaxud bala görə təhsil haqqı
nizamlanır. Eyni zamanda, ikili diplom veririk”.
Nəhəng kompleks, yeni binalar və
müasir kampus...
Qərb Universitetinin KİV-lə əlaqələr şöbəsinin əməkdaşı Vüsal Məmmədovbildirdi ki, hazırda Qərb Universiteti infrastrukturunun müasirləşdirilməsi,
maddi-texniki bazanın gücləndirilməsi üçün əsaslı işlər aparır, nəhəng
kompleks, yeni binalar və müasir kampusun tikintisi həyata keçirilir, müxtəlif
sahələrlə bağlı müasir, unikal laboratoriyalar qurulur: "Eyni zamanda yeni
ixtisaslar açılıb və ixtisasların sayı 36-ya çatıb. Qərb Universitetinin Qəyyumlar
Şurasının mövqeyi bundan ibarətdir ki, təhsil ocağı regionun aparıcı
universitetinə çevrilməlidir. Tələbə sayının ciddi şəkildə artacağını nəzərə
alaraq universitet illik təhsil haqlarını da aşağı salıb. Bundan əlavə,
universitet təhsil müddətində fərqlənən tələbələrə təqaüdlər ayırır və bundan
sonrakı dövrdə bu imkanlar daha da genişlənəcək. Yəni əgər universitetin qəbul
planı ilə bağlı narahatlığı olsaydı, yeni binalar və kampus tikməzdi”.
100 faiz təhsil haqqı güzəşti, 100 manat təqaüd
AzərbaycanKooperasiya Universitetinin mətbuat xidmətinin rəhbəri
Tamerlan Əkbərovda qeyd etdi ki, tələbələr xüsusilə təhsil
haqqına fikir verirlər, ona görə bu il təhsil haqlarında endirimlər edilib.
Eyni zamanda, tələbələrin yaxşı təhsil almaları üçün zəruri şərait yaradılıb: "Təhsil haqqını bəzi ixtisaslarda 1300 manata qədər
aşağı salmışıq. Tələbənin seçim etmək üçün birinci əsas meyarı təhsil haqqıdır.
Biz təhsil haqqından tam azad olmaq şəraiti də yaradırıq. Belə ki tələbə
universitetə daxil olsun, semestri əla qiymətlərlə başa vursun, onu yüz faiz təhsil
haqqından azad edirik, ayda 100 manat təqaüd veririk. Bu qayda elə birinci
kursun birinci semestrindən tətbiq olunur. İllərdir bu proses davam edir.
Onlara tələbə bundan yararlanıb. Bir sıra ölkələrin xüsusilə MDB ölkələrinin
kooperasiya universitetləri ilə əlaqəmiz var. Avropa ölkələrindən Türkiyə,
Fransanın universitetləri ilə əməkdaşlıq edirik, tələbə mübadiləsi həyata keçirə
bilirik. Tələbələrimizi həmin ölkələrin universitetlərinə göndəririk, onların tələbələri
bura gəlirlər. Universitetimizdə oxumaq üçün hər şərait yaradılıb. Tələbəyə ancaq
oxumaq qalır”.
"Yataqxanamızı genişləndiririk”
Bakı Avrasiya Universitetinin ictimaiyyətlə əlaqələr şöbəsinin müdiriŞəfayət Əliyev deyir ki, ilk olaraq təhsil haqqı ötən tədris
ili ilə müqayisədə azaldılıb: "Ötən il digər özəl ali təhsil müəssisələri ilə
müqayisədə bizdə təhsil haqqı aşağı - 2000 manat idi. O nöqteyi-nəzərdən biz ötənilki
tədbir planında özəl ali təhsil müəssisələri içərisində plan yeri dolmasına görə
üçüncü yerdə idik. Bizdə yerlərin 52 faizi doldu. Amma ötən il hardasa 1300 tələbə
ikinci turda keçid balını yığsa da, universitet seçimi etmədi. Seçim etməməkləri
də düşünürəm ki təhsil haqları ilə bağlıydı. Seçim edilsəydi yəqin ki bizim
planımız dolardı. Onu nəzərə alaraq builki təhsil haqlarında da 400 manata
yaxın endirim etdik. İndi ixtisasdan asılı olaraq bizdə təhsil haqqı 1600-1700
manatdır”.
Ş.Əliyev
bildirdi ki, tələbələrin rahatlığı, yaxşı təhsillə təmin edilməsi üçün
universitetdə digər işlər də görülməkdədir: "Yeni korpusumuz tikilir.
Universitetdə maddi-texniki bazanın daha da təkmilləşdirilməsi ilə bağlı digər
işlər də görülür. Otaqların kompüterləşməsi gedir, olanları yenilənir. Kitabxananın
təkmilləşdirilməsi, yeni kitabların alınması, elektron kitabxananın yaradılması
ilə bağlı da işlər gedir. Bir də rayondan gələn tələbələrin evlə təminat məsələsi
çox vaxt problem olur. Buna görə biz yataqxanamızı genişləndiririk. Təzə
korpusun işlərinə yeni yataqxananın tikintisi ilə başlamışıq. Bu rayondan gələn
tələbələrin təhsil haqqından əlavə, evlə təminata xərc çəkməməsi üçün edilib.
Bizdə hazırda 30 nəfərlik qızlar yataqxanası fəaliyyət göstərir. Artıq orda yer
olmadığı üçün yeni yataqxananın tikintisi gedir”.
Həm bakalavr, həm magistr pilləsində təqaüd...
"Azərbaycan" Universitetinin ictimaiyyətlə
əlaqələr şöbəsindənbildirildi ki, qarşıdakı qəbul dövrü üçün universitetin tanıtım-təbliğat
kampaniyası həyata keçirilir. Tələbələrə təklif edilənlərə gəlincə, qeyd olundu
ki, universitetdə 2013-cü ildən təqaüd proqramı tətbiq edilir. Bu təqaüd
proqramı tamamilə universitetin öz büdcəsindən maliyyələşir. Proqram iki hissədən
ibarətdir. Birincisi təhsil haqqından güzəşt hissəsidir. Bu, universitetə 420 və
yuxarı balla qəbul olanlara tətbiq olunur. 420-489 arası bal toplayanlara 25
faiz, 490-559-a qədər bal yığanlara 50 faiz, 560-599-a qədər nəticə göstərənlərə
isə 75 faiz güzəşt edilir. Nəticə 600-dən yuxarıdırsa, tələbə 100 faiz güzəştdən
yararlana bilərlər. 100 faiz güzəştin növbəti illərdə də davam etməsi üçün tələbənin
orta müvəffəqiyyət göstəricisi mütləq 83-dən yuxarı olmalıdır.
Eyni
zamanda, ikinci tədris ilindən etibarən qəbul balından asılı olmayaraq bütün tələbələrin
təqaüd almaq hüququ var. Müvəffəqiyyət göstəricilərinə uyğun olaraq tələbələrə
aylıq 50, 75, 100, hətta 200 manat təqaüd verilə bilər. Tələbələr bu təqaüdləri
almaq üçün 83 baldan yuxarı nəticə göstərməlidirlər. Təqaüdlər semestrlikdir. Həm
bakalavr, həm magistr pilləsində tələbələrin təqaüd almaq imkanı var. Əsas odur
ki onlar proqramın şərtlərini qarşılasınlar.
Aprel şəhidi
Fəxrəddin Qurbanlı Azərbaycan Universitetinin "Sosial iş” fakültəsinin 2015-ci
il məzunudur. 2016-cı ildə universitetdə "Şəhid Fəxrəddin Qurbanlı adına təqaüd”
təsis edilib. Təqaüdün ümumi məbləği 500 manatdır. Universitetə ən yüksək balla
qəbul olan tələbə birinci rübün ilk 4 ayında aylıq 125 manat təqaüd alır.
Müəllim-tələbə münasibətlərinin şəffaflığı və
normallığı...
Təhsil eksperti Əjdər Ağayev sözlərinə görə, özəl ali təhsil müəssisələri təhsil
haqqını azaltmaqla faydalı iş görürlər. Çünki abituriyentlər universitet seçimi
edərkən buna fikir verirlər. Bu, tələbə cəlb etmək üçün şərtlərdən biridir,
amma əsas şərt deyil: "İkinci əsas şərt odur ki, ali məktəbdə müasir təlim-texnologiyaları
güclü şəkildə qurulmuş olsun, tələbələr onlardan tədris prosesində istifadə edə
bilsinlər, həmçinin müəllimlər o texnologiyalardan istifadə edərək müasir təlim
metodlarını tələbələrə aşılaya bilsinlər. Üçüncü şərt universitetdə müəllim-tələbə
münasibətlərinin şəffaflığı və normallığıdır. Hansı ali məktəbdə tələbələr
onlara dərs deyən müəllimləri peşəkarlığı ilə yanaşı, insan olaraq da sevirlərsə,
ora həvəslə gedirlər. Düşünürlər ki, həm də yaxşı insanlıq mühiti var, tələbələr
orda incidilməyəcək. Hansısa bir işdə get-gəl varsa, yaxud universitetdə yuxarı
instansiyalara sözünü çatdırmaq üçün günlərlə vaxt sərf edilirsə, məsləhət
saatlarında tələbə gəlirsə və müəllim həmin vaxt orda olmursa, müəllim tələbə
ilə münasibətdə hansısa kobud söz işlədirsə, bu tələbələri universitetdən
uzaqlaşdırır”.
İşlə təminat perspektivi
Ə.Ağayev
deyir ki, bütün bunlarla yanaşı, əsas şərt ali təhsil müəssisini bitən məzunun
işlə təmin olunmasıdır: "Hansı ali məktəbin məzunları təhsillərini başa
vurduqdan sonra işlə tez təmin olunurlarsa, yüksək əmək haqqı almaq şansları
olursa, tələbələr ora maraq göstərirlər. Yaxşı iş üçün elektron sistemlər, xarici
dil bilikləri mükəmməl olmalıdır. Müasir tələblər və yeniliklər aspektində öyrədilən
ixtisasla yanaşı, kadrın elektron sistemlər, xarici dil bilikləri mükəmməl
olursa, müəssisələr onları işə həvəslə qəbul edirlər. Ali məktəblər tələbələrin
gələcəkdə iş tapa biləcəkləri müəssisələrdə təcrübə keçmələrinə şərait
yaratmalıdırlar. Təcrübə zamanı tələbələr özlərini göstərirlər və işçi olaraq
onları cəlb edə bilərlər”.
Ekspert
onu da bildirdi ki, universitetlər üçün plan yeri təyin edilməsi bu gün üçün
aktual deyil: "Əslində plan məsələsi iki il bundan əvvəl aradan qaldırılmışdı.
Ali məktəb özünün daxili imkanlarına görə tələbə qəbul etsin, amma əsas məsələ
oxuyub bitirməkdir. Məsələn, xaricdə 500 qəbul olur, 4 ildən sonra 200-ü
bitirir. Qalanları nə vaxt tədrisi mənimsəsə onda diplom alır. Plan sosializmdən
qalma bir şeydir. Az və ya çox ola bilər, əsas olan kadrın keyfiyyətli
olmasıdır”.
Aygün
Asimqızı